Ыам ыйын 9 күнэ дойдубут хас биирдии олохтооҕор ураты суолталаах, дириҥ өйдөбүллээх күн. Бу ытык бырааһынньыкка аан дойдуга эйэни , көҥүл олоҕу түстээбит аҕа көлүөнэ дьон үтүө ааттарыгар, хорсун быһыыларыгар сүгүрүйэбит !
Улуу Кыайыы 81 сылын уруйдуур долгутуулаах тэрээһин Бастакы Хомустаах нэһилиэгэр ыам ыйын 8 күнүгэр Гражданскай сэрии, Халхин – Гол, Аҕа дойду сэриитин кыттыылааҕа Л. Н. Неустроев пааматынньыгар Д. Ф. Алексеев аат. орто оскуола үөрэнээччилэрэ кыттыылаах ытык ветеран пааматынньыгар өйдөбүнньүк гирлянданы уурууттан , миитинтэн саҕаланна.
Бу кэнниттэн сэрии ветераннарыгар анаммыт бастакы пааматынньыктан саҕалаан "Ураа... !" хаһыылаах, араас өҥнөөх саардары туппут колонналар парадка биир кэккэнэн хаамтылар.
Параады салайда Кыһыл-Сыырдааҕы баһаарынай чаас байыаһа Александр Прибылых. Кыайыы кыһыл Знамятын күѳрэччи тутан хаамтылар Д.Ф. Алексеев аатынан 1-Хомустаах орто оскуолатын үөрэнээччилэрэ Попов Коля, Николаев Ярослав, Мамаев Айаал.
Кыайыы скверигэр ыытыллыбыт МИИТИНҤЭ кыттыыны ыллылар:
«Хомустах 1-кы нэһилиэгэ» тыа сирин түөлбэтин МТ баһылыга В. Г. Жирков.
- СӨ Государственнай мунньаҕын (Ил Түмэн) тыа сиригэр уонна аграрнай бэлиитикэҕэ сис кэмитиэтин бэрэссэдээтэлэ А. П. Атласов
- Нэһилиэк ветераннарын Сэбиэтин бэрэссэдээтэлэ З. Е Ощепкова.
- "Нам улууһа" МО бизнес инкубатор директора Б. Б. Бугаев.
Бука бары сүһүѳххэ туран, Аҕа дойду сэриитигэр кыргыһан эйэлээх олоҕу аҕалбыт хорсун дьоммут сырдык ааттарын санаан уонна анал байыаннай дьайыыга олохторун толук уурбут биир дойдулаахтарбытын кэриэстиир тохтобул мүнүүтэтэ ыытылынна, геройдуу быһыыларыгар ытыктабыл бэлиэтэ күөх харыйа лабааларынан гирлянда уурулунна. Тэрээһин кыттыылаахтарын эҕэрдэлээтилэр "Алгыс' норуот айымньытын киинин коллектива, И. С. Гаврильев аатынан Нам 1-кы №-дээх оскуолатын 3 кылааһын үөрэнээччитэ Айсаана Корякина-Ушакова, А.Н. Окоемов аат. "Мичээр" оҕо үҥкүү ансаамбылын улахан бөлөҕүн оҕолоро.
“Улыбка” оҕо уһуйаанын коллектива «Полевой кухня» минньигэс хааһытынан күндүлээтэ , ветераннарга бырааһынньыктааҕы "Күөх уот" ыытылынна.
Киэһээ Кыайыы күнүн көрсө киэргэтиллибит массыыналарынан автоколонна Аммосов уулуссанан субуруһа айаннаата. Автоколоннаны салайдылар кыһыл былаах киэргэллээх 1945 сыллаах Владислав Ядреев "ГАЗ-63" массыыната уонна Николай Сивцев "УАЗ" массыыната. Салгыы үгэскэ кубулуйбут “Өйдөбүнньүк чүмэчитэ” париотическай аахсыйаҕа Хомустаах Бастакы нэһилиэгин олохтоохторо кыралыын-улаханныын көхтөөхтүк кытыннылар.
Кыайыыны уһансыбыт, Ийэ дойдубут олоҕун оҥкулун оҥорсубут, эйэлээх олох туһугар олохторун толук уурбут буойуттарбыт сырдык ааттарын үйэтитэр ытык иэспит!
Комментариев нет:
Отправить комментарий