Бу сааскы чаҕылхай күн алаһа дьиэни араҥаччылааччыга, туруу үлэһиккэ, үтүөҕэ уһуйааччыга, сыралаах үлэтинэн, ахсаабат кыһамньытынан хас биирдии дьиэ уйгутун тэрийээччигэ ис сүрэхтэн ананар. Дьахтар мындыр өйө-санаата, таптала, аһыныгас майгыта, күүстээх санаата өрүүтүн да кыайыыга кынаттыыр...
Кулун тутар 7 кнүгэр "АЛГЫС" норуот айымньытын киинигэр олохтоох "Дорҕоон" вокальнай инструментальнай ансамбыл эр дьоно сылаас-истиҥ , мааны остуоллаах, тыыннаах доҕуһуол ырыа киэһэтин бэлэх ууннулар. Ол курдук, соло гитара - Иван Милютин, бас гитара - Алексей Орлов, ударнай - Александр Рязанскай, клавиша - Константин Борисов, хомус - Федот Алексеев.
Эҕэрдэҕэ кыттыһан Хатырык нэһилиэгиттэн " Махсыым уолаттара" (сал. Иннокентий Татаринов) кэлэн бу киэһэни киэргэттилэр. Ылбаҕай ырыанан истиҥ эҕэрдэлэрин тириэртилэр - Федот Алексеев, Ольга Сивцева, Петр Горохов, Людмила Попова, Марина Охлопкова, Лена Корякина. Бу киэһээ бириистэрдээх көрдөөх оонньуулар оонньоннулар.
Сынньалаҥ киэһэтигэр улууспут нэһилиэктэриттэн кэлэн сэргээн, үҥкүүлээн, санаа атастаһан дуоһуйдулар.
Түгэнинэн туһанан, бу бэлиэ күн бары Кэрэ аҥардарга доруобуйаны, этэҥҥэ буолууну, уҕараабат эрчими баҕарабыт. Хас үүнэр күн эһиэхэ үөрүүнү, чугас дьоҥҥут өйөбүлүн уонна саҥа ситиһиилэри аҕаллын. Сүрэххитигэр мэлдьи сааскы күн сандаардын! Бырааһынньыгынан, Аан дойду дьахталларын күнүнэн!
Комментариев нет:
Отправить комментарий