Ахсынньы 19 күнүгэр "Алгыс" норуот айымньытын киинигэр Улуу Кыайыы 80 сылын түмүктүүр тэрээһин ыытылынна. Тэрээһин тэрилтэлэр кыттыылаах "Хайыһар" ырыанан саҕаланна. "Хомустаах Бастакы нэһилиэгэ" Тыа сирин түөлбэтин баһылыга сыл устата Кыайыы 80 сылыгар анаммыт тэрээһиннэргэ көхтөөх кыттыыны ылбыт тэрилтэлэри махтал суругунан бэлиэтээтэ.
Бу күн ытык кырдьаҕас, тыыл бэтэрээнэ, РСФСР үөрэҕириитин туйгуна Колесов Семен Семенович 90 сааһынан дойдубут президенэ В В. Путин Эҕэрдэ суругун, СӨ Ил Дархана А. С. Николаев Эҕэрдэ суругун, өр сылларга үтүө суобастаах үлэтин уонна Нам улууһугар социально-экономическай кылаатын иһин "Ытык саас" бочуоттаах бэлиэни тутта.
Бар дьон эйэлээх олоҕун иһин сырдык тыыннара быстыбыт, анал байыаннай дьайыыга олохторун толук уурбут уолаттарбыт кэриэстэригэр анаан нэһилиэкпит олохтооҕо Р. П. Федотова оҥорбут видеоматериала көһүннэ. "Эйгэ" модельнай библиотека быыстапка тэрийдэ.
Тэрээһин "Кыайыы күнэ" ырыаны Д. Ф. Алексеев аат. орто оскуола 5 кылааһын үөрэнээччитэ Егор Петров толоруутугар, эйэлээх халлаан туругурарын туһугар алгыстанан түмүктэннэ.
Комментариев нет:
Отправить комментарий