Ахсынньы 6 күнүгэр Хомустаах Бастакы нэһилиэгэр "Алгыс" НАК сыл ахсын ыытыллар, СӨ култууратын туйгуна Анастасия Барашкова бырайыага "Хаарчаана Куо" күрэх, үрдүк таһымнаахтык ааста.
Бу бырайыак сылтан сыл ыытыллар таһыма үрдээн, сэҥээрээччи, кыттааччы да элбээн иһэр. Саала толору көрөөччүнэн туолан, кырачаан кыргыттарбыт долгуйуулара саарбаҕа суох. Быйылгы күрэххэ кыттыыны ыллылар:
- Табунанова Ангелина 1 ( 1 - Хомустаах)
- Барашкова Уйгулаана ( Хамаҕатта)
- Исакова Злата (Нам)
- Карамзина Сигуна ( Нам)
- Сивцева Аделия ( Нам)
- Захарова Тайаана ( 1-Хомустаах)
- Окоемова Асель
(1 - Хомустах)
- Парникова Аделина ( Партизан)
Тэрээһини иилээн саҕалаан ыыттылар Д. Ф. Алексеев аат. 1-Хомустаах орто оскуолатын 11 кылаас үөрэнээччилэрэ Инга Оконешникова, Давид Сысолятин.
Күрэх түөрт түһүмэхтэн турар, ол курдук хас биирдии түһүмэх тыҥааһыннаах, өрө көтөҕүүлээх буолла. Бастакы түһүмэххэ кыргыттар бэйэлэрин билиһиннэрдилэр.
Иккис түһүмэххэ кэрэчээн кыргыттар талааннарын, сатабылларын көрөөччүлэр сэргии көрдүлэр. Ким үҥкүүлээн тэлээрдэ, ким хомуска дьүрүһүйдэ, флейта да тыаһын иһиттибит.
Үһүс түһүмэх "Үтүө санаа" диэн ааттаах, кыргыттар бэйэлэрин сылаас илиилэринэн оҥорбут оҥоһуктарын аукциоҥҥа таһааран, дьон-сэргэ хамаҕатык ыллылар. Хомуллубут үп улууспутугар доруобуйаларынан хааччахтаах оҕолорго саҥа дьыллааҕы бэлэххэ ананна. Уопсайа 7050 солк. туттарылынна. Төрдүс түһүмэххэ Хаарчаана Куолар сыана устун хааман көрөөччүлэри сөхтөрдүлэр. Дьоро киэһэни бэйэлэрин үҥкүүлэринэн, хоһооннорунан киэргэттилэр
" Мичийээнэ" уһуйаан кырачаан кыргыттара, "Күнчээн", " Мичээр" оҕо үҥкүү ансамбыллара, "Сирдьит" үрдүкү кылаас оҕолорун түмсүүтэ.
Сыаналыыр сүбэҕэ үлэлээтилэр:
Римма Александровна Татаринова - П. П. Ядрихинскай - Бэдьээлэ аатынан Олоҥхо дьиэтин балетмейстера.
Агафья Афсентьевна Захарова - худуоһунньук, З. П. Винокуров аатынан Нмнааҕы оҕо искусствотын преподавателэ
Константин Иванович Колодезников А. Шестаков аат. Улуустааҕы норуот айымньытын дьиэтин директора.
Түмүккэ " Кэскилээнэ Куо" көрөөччүлэр биһирэбиллэрин ылла Аделина Парникова,
"Сандаара Куо" ааты ылла Уйгулаана Барашкова.
'Хаарчаана Куо - 2025" ааты ылла, күрэх кыайыылааҕынан таҕыста Ангелина Табунанова. Күлүмүрдүү оонньуур Хаарчаана киэргэлин кэтэттэ Алиана Ядреева "Хаарчаана Куо"- 2024 кыайыылааҕа.
Төрөппүттэр, эбээлэр кэрэчээн кыргыттара сыанаҕа саҥаран - иҥэрэн, туттан-хаптан хаамалларын көрөн харахтарыгар үөрүү, астыныы кыыма оонньоото.
Комментариев нет:
Отправить комментарий