Үөдэй нэһилиэгэ Эҥсиэли хочотун биир саамай кэрэ айылҕалаах Өлүөнэ өрүс биэригин кыйа турар. Кэрэ үтүө айылҕата киһини угуйа тардар күүстээх... Сэтинньи 24 күнүгэр "Олоҥхо айана" бырайыак ыаллыы сытар Үөдэй нэһилиэгэр, киэҥник биллибит норуот ырыаһыта, олоҥхоһут Гаврил Семенович Кычкин - Хабыанньа ( 1888-1971) олорон ааспыт түөлбэтигэр ыалдьыттаата.
Олоҥхоһуттары Үөдэй нэһилиэгин "Сарыал" СК коллектива ( директора Г.Г Игнатьев ) илиитигэр түһэрэн, үгэс курдук итии үүттээх чэйинэн, саһарчы буспут сылаас алаадьынан көрүстүлэр.
Олоҥхо истээччилэр тоҕуоруһа мустан, сэргээн истэн, саҥа аллайан толорооччулары кытта тэҥҥэ күөттэһэн истилэр. "Олоҥхо айана" бырайыах кыттааччылара нэһилиэкпит араас хайысхатыгар үлэлииллэр, туспа дьарыктаах дьон. Ол да буоллар быыс-арыт булан , тылларын-өстөрүн сылтан сыл тупсаран, чочуйан иһэллэрэ кэрэхсэбиллээх.
Үөдэй нэһилиэгэ былыр былыргаттан дэгиттэр талааннаах дьоннорунан биллэр. Олортон биирдэстэрэ Гаврил Семенович Кычкин - Хабыанньа (1888 - 1971 с. с.). Кини киэҥник биллибит норуот ырыаһыта, олоҥхоһута буолар. Гаврил Кычкин Үөдэйин дьонугар бэйэтин олоҥхотун сурайан хаалларбыт кинигэтин олохтоох дьаһалта сүрүннүүр специалиһа Екатерина Эверстова бэлэхтээтэ уонна толоруохтарын сөбүн эттэ.
Комментариев нет:
Отправить комментарий