Сэтинньи 25 күнэ -СӨ Олоҥхо күнэ. Сэтинньи 25 күнүттэн_ _ахсынньы 5 күнүгэр диэри өрөспүүбүлүкэҕэ олоҥхону киэҥник_ тарҕатыыга сылын ахсын декада биллэриллэр.
Хомустаах Бастакы нэһилиэгин "Алгыс" НАК иһинэн үлэлиир «Алгыс» олоҥхоһуттар бөлөхтөрө тэриллэн үлэлээбитэ номнуо 9 сыл буолла. Нэһилиэнньэҕэ куруһуогу тэрийэн ыытар СӨ култууратын туйгуна, фольклор специалиһа Елена Руфова:
«Култуура эйгэтигэр үлэлээбитим 20- чэ сыл буолла. Оскуола саастаах оҕолору, улахан дьону төрүт былыргы үгэспитигэр чабырҕахха, олоҥхону толорууга, туойарга, үгэҕэ үөрэтэргэ үлэлэһэбин. Сахабыт ырыата-тойуга, үйэттэн үйэҕэ дьиэрэйэрин туһугар үөрэппит- такайбыт опыттаах педагогтарбар - Афанасий Семенович Федоровка, Мария Гаврильевна Боппоеноваҕа махталым муҥура суох. Кинилэр биэрбит билиилэрин сиэппэр укта сылдьан, күн бүгүнүгэр дылы үлэлиир үлэбэр туһанабын. Быйылгы үлэ сезонугар "Олоҥхо айана" бырайыагы олоххо киллэрдибит. Ол курдук, улууспут үс нэһилиэгэр П. П. Ядрихинскай - Бэдьээлэ " Кыыс бухатыыр - Дьырыбына Дьырылыатта" олоҥхотуттан быһа тардан толоруохпут. Бүгүн Ытык Таастаах нэһилиэгэр ыалдьыттаатыбыт. Оруоллары толордулар:А.М. Татаринов- Удьурҕай - Арылы Тойон, У. Н. Винокуров - Сорук Боллур, Тимир Чохчордоон, А. Д.Аргунова - Обот Хобочой удаҕан, И. Н. Николаева - Аан Алахчын, Е.Д. Охлопкова - Айыы Нуоралдьын эмээхсин, Л.П. Корякина - Дыллыа маҥан ат."
Ыалдьытымсах Таастаах дьоно олоҥхоһуттары итии үүттээх чэйинэн, арыылаах алаадьынан айах тутан көрүстүлэр. Олоҥхону истэ кэлбит дьон биир чаас устата бэрт умсугутуулаахтык иһиттилэр. Нам улууһун, Таастаах нэһилиэгин Ытык киһитэ, үлэ ветерана, норуот ырыаһыта, Ийэ олонхоһут Афанасий Егорович Соловьев хаан- уруу аймахтара ыалдьыттаабыттара тэрээһин суолтатын үрдэттэ.
Комментариев нет:
Отправить комментарий