Нэьилиэкпит кулуубугар 1960 сылларга кулууп сэбиэдиссэйинэн улэлээбит Евдокия Николаевна Васильева ахтыытын сэргии аа5ын.
Олоҕум биир бэлиэ кэмэ
1963 с. үлэлии кэлэрбэр 1 Хомустаах кулуубун диэтэ, билигин О5о искусствотын оскуолата , Нам совхоз хонтуората этэ. Онтон сотору кэминэн саҥа хонтуора тутуута бүтэн, көспүттэрэ. Мин иннибэр үлэлээбит Матрена Кузьминична Попова үлэтин туттаран, тугу гыныахтааҕым туһунан кэпсээн, көрдөрөн баран, үөрэнэ барбыта. Манна үлэлии кэлиэм иннинэ Дьокуускай куоракка Бутун Союзтаа5ы (ВОС) хараҕа суохтар кулууптарыгар үлэлээбитим. Онно үлэлииргэ судургу этэ, бэлэм коллектив, бары үөрүүнэн үлэлэрин кэнниттэн кэлэн дьарыктаналлар этэ.
Дьэ, манна кэлбитим доо, үлэ бөҕө, төбөм оройунан түстүм ээ. Дьону билбэтим, кими кытта хайдах кэпсэтиэхпин, ким туох талааннааҕын. Үлэбин саҕалыырбар улахан көмөнү оччотооҕу сэбиэт председателэ Ушницкай Никита Платонович, совхоз комскомун сэкэрэтээрэ Муксунова Ася оҥорбуттара. Плакаттарбытын, биллэриибитин кэргэмминээн, кини үлэтин кэнниттэн, өрөбүлүгэр бэйэбит суруйарбыт.
Оччолортон баччаҕа
диэри саамай тутаах киһи кулууб үлэтигэр музыкант буолар. Любитель баянистар
Винокуров Василий Иванович, Атласов Павел Иванович, Азаров Николай Филиппович
абырыыллара. Дьонум бу тулуурдарын, дьулуурдарын билигин кэлэн сөҕөбүн. Сорох
ырыаһыт Василий Ивановичка, эбэтэр Павел Ивановичка эрэ доҕуһуоллаталлара.
Саамай түбүктээх,
кэтэһиилээх бырааһынньык Саҥа Дьыл корсүү буолар. Бу манна эргийэр елканы
туруораары, лампочкалара мигайдыы сылдьар буолуохтаах, ону оҥороору олус да
бары туруммуппут, оччолорго электричество күүһүн саҥа туһаныллар кэм этэ.
Дэриэбинэҕэ уоту уон биир чааска эрэ дылы биэрэллэрэ. Улахан көҥүлүнэн,
кэпсэтиинэн 12- гэ дылы дизель холбууллара. Елкабытын эргийэр оҥорон, клубпут
иһин таһын күлүмүрдэс уотунан киэргэтэн олус үөрүүлээх саҥа дьылы
бырааһынньыктаан турардаахпыт. Эдэр ыччат олус көхтөөх, түмсүүлээх этэ. Бары
үлэ кэнниттэн үөрэ-көтө кэлэн бэлэмнэнэллэрэ. Уолаттарбыт репетицияҕа сыарҕалаах атынан кыттааччылары таһаллара.
Дэриэбинэ иһин Баишев Сеня, Арыы Тииттэн Кривошапкин Степа аҕалаллара.
Хас бырааһынньык, фестиваль, агитбригада
көхтөөх кыттааччылара - ырыаһыттар Муксунова Ася, Жирков Сеня, Пинигин Коля,
Аня Харитонова, Павел Иванович, Василий Иванович, Тамара диэн детсадка үлэлии
кэлбит кыыс, үҥкүүһүттэр - Баишев Сеня, Пестерева-Васильева Луиза, Азарова
Настя, уо. д. а., испэктээкилгэ Петров Иннокентий Николаевич (Элигиэт)
үчүгэйдик оонньуура. Өссө биир түгэни үчүгэйдик өйдүүбүн, оччолорго кыра кыыс
бэйэтин саҕа баяны кыайа тутан сыанаҕа оонньообутун, ол- Лена (Елена
Александровна Кутукова) этэ. Кэлин детсадка музыканынан үлэлээбитэ.
Совхоз отделениелара Үөдэй, Партизан,
Хомустах бэйэ бэйэбитигэр концертыырбыт, онтон талан ылан оройуоҥҥа баран
күрэхтэһэрбит. Биирдэ элбэх массыынаны плакаттарынан киэргэтэн, колоннанан айаннаан Намҥа тиийэн улахан концерт көрдөрбүттээхпит. Онно бары үрдүк
көтөҕөллүүллээх санааннан кыттыбыппытын хаһан да умнубаппын.
Агитбригаданан саас
ыһыы, сайын от үлэтигэр, сайылыктарга концертаах, лекциялаах, передвижной
библиотекалаах – библиотекарь Татьяна Васильевна Новгородова, айаннаан
дьоммутун сэргэбитин сэргэхситэрбит. Кыһынын фермаларга тиийэн, ынахтар турар
миэстэлэригэр ааттарын табличка оҥорон ыйыырбыт, дояркалар төһө үүтү ыылларын
көрдөрүүтүн түмүктээн кыһыл муннукка ыйыырбыт, кэпсиирбит. Маннык тэрээһиннэргэ
сылдьан киһи дьону билэр эбит.
1965 с. Кыайыы күнүгэр бэлэмнэнэн, эргэ оскуола аттыгар турар памятникка сэрии кыттыылаахтарын ааттарын трафарет онорон кэргэним Анатолий Иванович Васильев, миэхэ көмөлөһөн суруйбута, ол балай да өр турбута, кэлин саҥардыбыттара. Ол дьыл аан бастаан Кыайыы күнүгэр парадтаабыппыт. Лазарев Григорий Алексеевич түһэрбит хаартыскалара нэһилиэк биир бэлиэ түгэнин туоһулуур.
Үлэлиир кэммэр улахан артыыстар, ансамбыллар кэлэн кулууппутугар гастроллаан ааспыттара. Азербайджан биллиилээх ырыаһыта, үҥкүүһүтэ Тамара Ханум кэлэн бэйэтин норуотун культуратын көрдөрөн ааспыта. Валерий Ноев, Ньүрба театра, Культпросвет устудьоннара уо.д.а. Билигин да өйдөөччүлэр
бааллара буолуо, улахан ансамбль Новосибирскайтан кэлэн
концертаабытын. Ол Новосибирскайдааҕы опера уонна балет театрыттан ансамбль
песни и пляски этэ. Оннук атын да улахан республика таһымнаах мероприятиялар,
фестиваллар делегацияларын көрсөһүүтүн тэрийэрбит. Оннук республика таһымнаах «Дружба
народов Севера» диэн фестиваль түмүгүнэн
Нам оройуонугар сорудах биэрэн, «Нам» совхозка ыһыах тэрийтэрбиттэрэ. Ол тэрээһиҥҥэ
оройуон , совхоз салалта бары түмсэн аллара кытылга ыһыах тэрийбиппит, онно
араас регионнартан делегациялар, байыаннайдар бааллара, улахан эппиэтинэстээх этэ.
Клубка оччолорго
киномеханигынан Охлопков Петр Прокопьевич үлэлээбитэ, сэбиэдиссэй мин, уборщицанан
Дмитриева Федора Григорьевна, кочегар-охраннигынан Софронов Михаил Иннокентьевич.
Дора ийэлии эйэ5эс сыһыана, Мэхээлэ үлэтигэр эппиэтинэһэ миэхэ улахан көмө этэ.
Кыра коллектив да буолларбыт, «мин үлэм буотах» диэбэккэ, ким да туора турбакка
бары тэҥҥэ сылдьарбыт.
Олорон ааспыт олоҕум
биир бэлиэ кэмнэрин - кэрэ эйгэтигэр үлэлээн нэһилиэгим дьонун - сэргэтин кытта
ыкса алтыһан, «Хомустаах 1-кы» нэһилиэгэ МТ «Ытык Ыала» , нэһилиэк бочуотун кинигэтигэр
киирбит - Ийэ аатын сүгэн, ытыктабылы - өйөбүлү ылан олорорбунан киэн туттабын,
үөрэбин , махтанабын.
Нэһилиэкпитигэр тыа сирин кулууба тэриллибитэ
70 сылынан «Алгыс» НАК коллективын истиҥник эҕэрдэлиибин,
айымньылаах үлэҕитинэн бар дьоҥҥутун кэрэҕэ угуйа, үөрдэ туруҥ, тус олоххутугар
ситиһиини, дьолу баҕарабын.
Васильева Евлокия Николаевна ,
СӨ строительнай комплексын ветерана,
СӨ агропромышленнай
комплексын ветерана
Бүлүү улууһун Бочуоттаах гражданина
.
Комментариев нет:
Отправить комментарий