Бүгүн биһиги нэһилиэкпитигэр үөрүүлээх бэлиэ түгэн – төрөөбүт түөлбэбит барҕара сайдыытын туоһутугар сырдык, сылаас 70 төбөҕө анаммыт аныгы тииптээх, эдэр фермер Ядреев Федот Федотович бааһынай хаһаайыстыбатын саҥа хотоно арыллар үөрүүлээх күнэ тосхойдо.
Саҥа хотон СӨ Тыатын хаһаайыстыбатын Министиэристибэтин кеҕүлээһининэн “Кыра кыамталаах хотоннору тутуу уонна саҥардыы” өрөспүүбүлүкэтээҕи программа чэрчитинэн тутулунна. Бу тутууну Дьокуускай куораттан «Аркадестрой” чааһынай тутуу тэрилтэтэ ыытта (сал. Корякин Иван Егорович). Инникитин хороҕор муостаах элбии, эбиллэ турарыгар анаан үрдүк айыылартан көрдөһөн алгыстаах тылларын анаата СӨ Культуратын туйгуна, Нам улууһун Ытык киһитэ, 1-Хомустаах, Таастаах нэһилиэктэрин бочуоттаах олохтооҕо Филипп Алексеевич Соловьев. Бу күн эҕэрдэ тыллары анаан эттилэр:
• «Хомустаах 1-кы нэһилиэгэ» Тыа сирин түөлбэтин баһылыга В. Г. Жирков.
• «Нам улууһа» МО баһылыгын тыа хаһаайыстыбатыгар солб. Ф. В. Николаев
• СӨ Государственнай мунньаҕын (Ил Түмэн) тыа сиригэр уонна аграрнай бэлиитикэҕэ сис кэмитиэтин бэрэссэдээтэлэ А. П. Атласов.
• “Нам улууһа” МО тыа хаһаайыстыбатын управлениетын начальнига В И. Макаров
• Улуус фермердэрин ассоциациятын бэрэссэдээтэлэ Е. И. Стручкова.
Фермер Федот Ядреев "За отличие в развитии предпринимательства" бэлиэни тутта, ону сэргэ 1977 сыллаах выпустар эҕэрдэлэрин тириэртилэр уонна бэйэлэрин сэмэй бэлэхтэрин туттардылар.Үөрүүлээх быһыыга-майгыга аалай кыһыл лиэнтэни кырыйан үөрүүнү-көтүүнү үрдэттилэр. Салгыы саҥа хотон тутуутун киирэн көрдүлэр, иһиттилэр. Эдэр ыал бу курдук ыараханнартан чаҕыйбакка, өр кэмҥэ дьаныһан туран аныгы матырыйаалынан тутуллубут саҥа хотоннорун киллэрэн үөрүүлэрэ улахан. Санааларын тириэрдибит салайааччылар эдэр дьоҥҥо холобур буолалларын, салгыы бу курдук хороҕор муостааҕы иитэн, үүтү-эти дэлэтиигэ үлэлэһэ туралларыгар баҕардылар.
Комментариев нет:
Отправить комментарий