Айылҕа барахсан көмүс дуйунан бүрүнэн, сири-дойдуну көмүскэ суулаан, киэргэнэн турар кэмигэр Хомустаах Бастакы нэһилиэгэр, балаҕан ыйын 19 күнүгэр "Көмүс күһүн бэлэҕэ" атыы-кутуу дьаарбаҥката, түөлбэлэринэн күрэх ыытылынна.
Бу күн дьон-сэргэ сүргэтэ өрө көтөҕүллэн, үөрэ-көтө муһунна.Дьаарбаҥканы "Листья желтые" ылбаҕай ырыанан "Алгыс" НАК коллектива арыйда. Кэлбит ыалдьыттарга, олохтоохторго эҕэрдэ тылларын анаатылар "Хомустаах Бастакы нэһилиэгэ" тыа сирин түөлбэтин баһылыга В. Г. Жирков,тыа хаһаайыстыбатын специалиһа С. И. Кривошапкин. "Күһүҥҥү киһи күлбүтүнэн" - сайын устата хаһаайкалар оҕуруот аһын дэлэччи үүннэрэн дьон көрүүтүгэр уонна атыылаһан ылалларыгар туруордулар.Хас биирдии түөлбэ бу күн ох курдук бэлэмнэнэн, күһүҥҥү күрэххэ кыттардыы, кыайардыы оҥостон кэлбит, күрэх түһүмэхтэригэр балаһыанньа быһыытынан үстүү киһи кыттыыны ылыахтаах. Ол курдук, бастакынан «Осенний вернисаж» күрэх ыытылынна. Ватман илииһигэр айылҕа матырыйаалыттан 20 мүнүүтэ устата хартыына оҥорон дьүһүйдүлэр. Бу кэннэ, миэстэтигэр 10 мүнүүтэ иһигэр оҕуруот астарынан, минньигэс салаттары астаатылар.
Түмүккэ:
1 миэстэ - "Саһарҕа" түөлбэ ( сал. Нь. Р. Сысолятина) кыттааччылар Прасковья Румянцева, Роман Дягилев, Матрена Манькова.
2 миэстэ - "Дьулуур" түөлбэ ( сал. М. П. Сысолятина ) кыттааччылар Прасковья Соловьева, Светлана Филиппова, Николай Соловьев.
3 миэстэ - "Кустук" түөлбэ ( сал. Е. И. Руфова) кыттааччылар Анна Степанова, Иван Тумусов, Софья Иванова таҕыстылар. "Чагда " түөлбэттэн ( сал. А. К. Барашкова) эдэр хаһаайкалар Кристина Соловьева, Анастасия Баишева , Виктория Баишева олус үчүгэйдик кытыннылар.
«Гигант ,тыква!” күрэҕэр кыайыылаах Мария Сысолятина, "АРБУЗ -ЭКСПО" күрэх кыайыылаах Сардана Тумусова тэҥнээхтэрин булбатылар. Күн-дьыл барахсан да анаан-минээн туран биэрэн, дьаарбаҥка бырааһынньыгын тупсаран биэрдэ. Үгэс буолбут күһүҥҥү дьаарбаҥкаҕа кыттыыны ылбыт дьоммутугар махтанабыт! Бар дьоммутугар ил-эйэ, чэгиэн доруобуйа, уйгулаах олох тосхойдун!
Комментариев нет:
Отправить комментарий