Бүгүн биһиэхэ уһулуччу суолаталаах күн. Сүдү суолталаах Өрөспүүбүлүкэ күнүн бэлиэтиир дьоһун бырааһынньыкпыт. Бу үөрүүлээх күнүнэн Сахабыт Сирин бары олохтоохторун эҕэрдэлиибит!
1920 с. П.А. Ойуунускай салайааччылаах анал хамыыһыйа национальнай суверенитекка олоҕурбут Саха Өрөспүүбүлүкэтин кэлэр дьылҕатын быһаарар бырайыагы бэлэмнээбитэ. Биир сүрүн көҕүлээччи биир дойдулаахпыт М.К. Аммосов этэ. Чопчу кини ССКП уонна РСФСР Омуктар дьыалаларыгар норуодунай комиссариатын иннилэригэр Саха Автономнай Сэбиэскэй Социалистическай Өрөспүүбүлүкэтин тэрийэр туһунан боппуруоһу көтөхпүтэ.Кини дакылаатыгар олоҕуран, уобаластааҕы баартыйа мунньаҕа автономияны киллэрэр туһунан резолюция ылыммыта. Маны 1921 с. алтынньытыгар буолбут Саха сиринээҕи өрөбөлүүссүйэ кэмитиэттэрин бастакы сийиэһигэр эмиэ өйөөбүттэрэ.
Бу күн, нэһилиэкпитигэр "Алгыс" норуот айымньытын киинин тэрийиитинэн А. Н. Окоемов аатынан сынньалаҥ пааркатыгар бырааһынньыктааҕы тэрээһиҥҥэ дьон -сэргэ сүргэтэ өрө көтөҕөлүннэ. Тэрээһин С. А. Зверев - Кыыл Уолун " Оһуор' үҥкүүтүгэр олоҕуран туруоруллубут, түмэр, сомоҕолуур, алгыстыыр аналлаах " Тоҕус мэҥэ хамнаныынан" саҕаланна. Эҕэрдэлэрин тириэртилэр "Сарыада" вокальнай ансаамбыл ( сал. м.Охлопкова) ," Умсулҕан" фольклорнай студия ( сал. А.Аргунова).
Саха норуотун биир бастыҥ үҥкүүтүгэр, бар дьоммут тоҕуоруһа мустан, күн эргииринэн төгүрүччү туран, илии-илииттэн ылсыһан, атах-атахтан тэпсиһэн эһиэкэйдээн эйээрдилэр, оһуокайдаан ойдулар. Оһуокайы таһаардылар фольклор специалиһа, СӨ култууратын туйгуна Елена Руфова, И. П. Винокуров аат. Намнааҕы оҕо искусство оскуолатын 1-Хомустаахтааҕы филиалын фольклор специалиһа Урсун Винокуров.Бу үөрүүлээх күн тэрээһин кыттыылаахтарыгар төрүт аспыт сандалыта тэриллэн алаадьынан айах тутан, итии ис миининэн сылаа киллэрэн үөрүүтэ үксээтэ. Дьокуускайтан "Айар" кинигэ кыһатын быыстапката, ас-үөл атыыта тэриллиннэ.
Комментариев нет:
Отправить комментарий