Кыһыҥҥы улук ууттан айылҕа уһуктуутун, күн уһуурун уруйдуур үөрүүлээх бырааһынньык «Кыһыны атаарыы» диэн ааттанан, бу үтүө үгэс көлүөнэттэн көлүөнэҕэ тириэрдиллэн күн бүгүнүгэр тиийэ ыытыллан кэллэ. Биир сиргэ түөлбэлээн, доҕордуу олорор омуктар буоларбыт быһыытынан, сахалар бу үтүө үгэһи ылынан сыллата кырыа кыһыммытын атаарабыт, сандал сааһы уруйдуубут.
Муус устар ый 12 күнүгэр үгэскэ кубулуйбут кыһыны атаарыы бырааһынньыга бэрт сэргэхтих буолан ааста. Сааскы күннээх халлааммыт туран биэрэн киһи- аймах тоҕуоруһа мустан оонньооҥ-көрүлээн, ылаан-туойан, нэһилиэкпит түөлбэлэрэ күрэххэ кыттан өттүк харалаах, илии тутуурдаах тарҕастылар. Тэрээһин үөрүүлээх аһыллыытын "Алгыс" норуот айымньытын иһинэн үлэлиир "Татыйык" вокальнай коллектив кыргыттара саас кэлбитин уруйдаан "Күн бытархайа" ырыанан астылар. Россияҕа Норуоттар сомоҕолоһууларын, Саха сиригэр Культура сылынан " В единстве - наша сила" араас жанрга түөлбэлэринэн эҕэрдэ музыкальнай нүөмэр күрэҕэр
1️⃣ миэстэ - "Саһарҕа" түөлбэ
2️⃣ миэстэ - " Чагда" түөлбэ
3️⃣ миэстэ - "Кустук" түөлбэ буоллулар.
Урукку кэмҥэ дьон самабаар чэйин астынан туран оргутан иһэллэрин бэркэ билэбит. Ол курдук түөлбэлэринэн эр киһи кыттыылаах " Самовар оргутуута" буолла. Туораттан көрөн турааччыларга бу күрэх бэрт тыҥааһыннаах буолла. Самабаарга тэҥ гына кутуллубут уу бидилийэ оргуйан
1️⃣ миэстэ - "Кустук" түөлбэ
2️⃣ миэстэ - "Дьулуур" түөлбэ
3️⃣ миэстэ - " Чагда" түөлбэ таҕыстылар.
Маны таһынан оҕолорго анаан күүстээх, сымса буоларга күрэхтэр ыытылыннылар.
"Хаатынкаҥканы ыраахха дылы кыыратыы", "Сыттыгынан охсуһуу" "Бөтүүктэһии". Оҕолор күрэххэ көхтөөх кыттыыны ылан минньигэс бириистэри тутан астыннылар. "Космический алфавит" викторина кыайыылааҕынан Виктьрия Баишева таҕыста.Бырааһынньык биир саамай көстүүлээх, ыһыылаах-хаһыылаах күрэҕинэн УАЗ массыынаны быанан тардан соһуу буолла.Бу күрэххэ оскуола оҕотуттан саҕалаан, дьахталларга тиийэ кииристилэр. Эр дьоҥҥо кыайыылаах "Дьулуур" түөлбэттэн Алексей Татаринов , дьахталларга "Кустук" түөлбэттэн Татьяна Соловьева буолла.
Бу курдук үөрүү-көтүү аргыстаах тэрээһиммит нэһилиэкпит дьонун-сэргэтин түмэн кыһыны атаардыбыт. Кыттыбыт дьоммутугар улахан махталбытын тиэрдэбит! Өрүүтүн да маннык көхтөөх буолуҥ, дьолу-саргыны, доруобуйаны баҕарабыт!
Комментариев нет:
Отправить комментарий