Сааскы кэм үгүс култуура тэрилтэлэригэр барыы- кэлии, айан кэмэ. Култуура кииннэрин иһинэн үлэлиир түмсүүлэр, куруһуоктар кыһын устата бэлэмнээбит репертуардарынан үгүс күрэхтэргэ кыттыыны ылаллар. Ол курдук, "Алгыс" НАК иһинэн үлэлиир түмсүүлэр республика таһымнаах күрэхтэргэ ситиһиилээхтик кыттыыны ыллылар.
- Кулун тутар 6 күнүгэр Мэнэ -Ханалас улууһун , Майа сэлиэнньэтигэр Д.Ф.Ходулов аат. култуура киинигэр ыытыллыбыт "Күн чөмчүүк" республикатаа5ы үҥкүү коллективтарын күрэҕэр "Күндүүнэ" үҥкүү коллектива 2 ст. Лауреат ылары ситистэ. Салайааччы Алена Охлопкова, А.Н."Мичээр" ҮНА репетитора. Кулун тутар 28 күнүгэр "Алгыс" НАК ыытыллыбыт "Күн мичээрэ " республикатаа5ы үҥкүү коллективтарын күрэҕэр 2 ст. Лауреат.
- Муус устар 2 күнүгэр Хаҥалас улууһун А. С. Данилова аатынан "Барҕарыы" култуура киинэ уонна Өктөмнөөҕү норуот тыйаатырын проегынан Ксения, Егор Черкашиннар ааттарынан "Дьээбэ - хообо" аһаҕас күрэҕэр "Мэскэйдэр" бөлөх кыттыыны ыланнар "Бастыҥ тыл ууһа" анал ааты ыллылар. Салайааччы СР култууратын туйгуна Елена Руфова. Күрэх Уус-Алдан Тумул нэһилиэгэр ыытылынна.
- Муус устар 4 күнүгэр Саха биллиилээх самодеятельнай композитора, Саха Хомсомуолун бириэмийэтин лауреата, СӨ норуодунай артыыһа, СӨ култууратын үтүөлээх үлэһитэ, Мэңэ Хаңалас, Кэбээйи, Үөһээ Бүлүү, Амма улуустарын бочуоттаах гражданина, Дьокуускай куорат уонна СӨ ытык олохтоо5о, Арассыыйа суруналыыстарын сойууһун чилиэнэ Аркадий Михайлович Алексеев ырыаларынан ыытыллар "Көтөллөр көмүс дор5ооннор» биирдиилээн ырыаны толорооччуларга аһаҕас ырыа күөн-күрэһэ Аллараа Бэстээх бөһүөлэгин В.В. Местников аатынан култуурунай сайдыы киинигэр ыытылынна. Манна "Сарыада" вокальнай коллектив кыттыылаахтара Анастасия Барашкова, Надежда Васильева, салайааччы Марина Охлопкова ситиһиилээхтик кыттыыны ыллылар.
- Муус устар 4 күнүгэр Дьокуускай куорат, Жатай бөһүөлэгэр оҕо үҥкүү бөлөхтөрүгэр аналлаах республикатаа5ы «Танцует детство» күрэх ыытылынна. А. Н. Окоемов аатынан "Мичээр" оҕо норуодунай ансамбылын улахан бөлөҕө кыттыыны ылла. Норуодунай коллективтар категорияларыгар 1 ст. дипломант буоллулар. Үҥкүүлэри туруорда салайааччы Константин Борисов.
- Муус устар 5 күнүгэр Мэнэ -Ханалас улууһун , Майа сэлиэнньэтигэр Д.Ф.Ходулов аат. култуура киинигэр биллиилээх мелодист, СӨ култууратын үтүөлээх үлэһитэ Виталий Андросов төрөөбүтэ 75 сылыгар аналлаах "Дьиэрэй ырыам" республикатааҕы вокальнай ансаамбыллар уонна кыра формалаах вокальнай бөлөхтөр (трио, квартет) күрэхтэрэ буолан ааста. Манна Марина Охлопкова салайар "Татыйык" вокальнай ансаамбыла кыттыыны ылан, " Көрөөччү биһирэбилэ" анал ааты ылары ситистэ.
Комментариев нет:
Отправить комментарий