МБУ ЦНТ "Алгыс" с. Кысыл- Сыр, Намского улуса

 

Судаарыстыбыннас күнүн көрсө түөлбэлэр  икки ардыларыгар күлүмнэс күһүн,  баай байылыат кэмин бэлиэтиир тэрээһин кыттааччылары түмэ тарта. 

Иккис килиэбинэн аатырар, биир бастыҥ аспыт "Хортуоска тойоҥҥо" анаммыт күрэх бэрт сэргэхтик ыытылынна. Ол курдук , түөлбэлэр тэҥ форма кэтэн,  девизтэнэн бэйэлэрин билиһиннэрдилэр, салгыы эрдэ бэриллибит сорудаҕынан "Мин Өрөспүүбүлүкэм" тиэмэлээх айылҕа матырыйаалыттан оҥоһуллубут поделкаларын көрдөрдүлэр. Салгыы "Эйгэ"  модельнай библиотека бэлэмнээбит "Царь- картошка" викторинатыгар эппиэттээтилэр. Төрдүс түһүмэххэ бириэмэҕэ  хортуоска  хахтааһыныгар илин- кэлин түһүстүлэр, сыаналыыр сүбэ манна хортуоска ыраастааһынын хаачыстыбатын эмиэ  көрдө.Салгыы  казан иһиккэ хортуоскаларын ыһаарылаатылар, минньигэстик ыһаарыламмыт хортуосканы сыаналыыр сүбэ быһаарда.

Ону сэргэ биирдиилээн кыттааччыларга "Экзотический овощ, "Богатырский картофель"  , "Осенний букет" күрэхтэр ыытылыннылар. Эриэккэс оҕуруот аһын Огурдыняны аҕалан Маргарита Попова, бастыҥ букеты оҥорон Анастасия Трофимова, саамай улахан хортуоскалаах хаһаайынынан тахсан Степан Сивцев бириис туттулар.Уопсай түмүккэ бастакы  миэстэ "Чагда" (сал. Барашкова А.К), иккис  миэстэ "Дьулуур ( сал. Сысолятина М.П) үһүс миэстэ "Саһарҕа" ( сал. Сысолятина Нь.Р.) төрдүскэ  "Кустук" ( сал. Руфова  Е.И.)  бэһискэ "Үрдэл"( сал. Лиханов  Р.А.)  таҕыстылар.  Түөлбэлэригэр анаан дьиэтээҕи сорудаҕы (поделка) оҥоһук оҥорбут дьоммутугар Мария Рожинаҕа, Туяра Жирковаҕа, Айаал Румянцевка, Дарья Аргуноваҕа, Людмила Поповаҕа, Сахаайа Дорос анал  бэлэхтэр туттарылыннылар. Сыаналыыр сүбэҕэ үлэлээтилэр "Хомустаах Бастакы" нэһилиэгэ МТ баһылыга В.Г.Жирков, тыа хаһаайыстыбатын салаатын специалиһа С.И.Кривошапкин, "Илгэ Хотун" СПОК салайааччыта О.В.Сивцева.

Бу күн улуус баһылыга Ю. И. Слепцов күндү ыалдьытынан буолла, тэрээһин кыттыылаахтарын  эҕэрдэлээтэ. Тимир ууһа, маастар, дэгиттэр талааннаах  Михаил Александровичка Баишевка ""Нам улууһа"  МТ кылаатын иһин "  бэлиэни туттарда.

 Маны сэргэ Михаил "Хомустаах Бастакы" нэһилиэгэ МТ кылаатын иһин" бэлиэтин баһылык В.Г. Жирковтан үөрүүлээх быһыыга- майгыга тутта. Тыа хаһаайыстыбатын специалиһа С.И. Кривошапкин быйылгы үүнүү, от-  мас үлэтин  туһунан иһитиннэрдэ.

Тыа сирин үтүө үлэһит дьонугар анаан ардахтыы турар халлаан туран биэрэн дьон -сэргэ дуоһуйа тэрээһиҥҥэ сырытта, "Айар" кинигэ издательствота кинигэ атыытын тэрийдэ, эбиэт кэннэ  "Рядовой Чээрин" киинэ көрдөрүлүннэ.