Аан дойдутааҕы үҥкүү күнүгэр анаммыт киэһээ нэһилиэкпит кыратыттан саҕалаан аҕам саастаахтарыгар диэри үҥкүүгэ сүгүрүйээччилэри түмэ татта. Үҥкүү киэһэтигэр кыттыыны ыллылар:
“Мичийээнэ”, “Улыбка” оҕо уһуйаанын иитиллээччилэрэ, “Күнчээн”, “Күндүүнэ”, “Чэбдик” үнкүү бөлөхтөрө, “Мичээр” ансаамбыл бары бөлөх иитиллээччилэрэ уонна эдэр ыччатын бөлөҕө.
Бу киэһээ уон сыл устата үҥкүүгэ уһуйуллубут, ансаамбыл выпускниктарын атаарыы үөрүүлээх түгэнэ ыытылынна. Ол курдук, А.Н. Окоемов аатынан “Мичээр” үҥкүү народнай ансаамбылын быйыл 12 оҕо ситиһиилээхтик бүтэрдилэр: Алина Рожина, Сайаана Мылаханова, Күннэй Табунанова, Кристина Лиханова , Динара Лиханова, Анита Винокурова, Алиада Оконешникова, Георгий Соловьев, Лев Заболоцкий, Андрей Охлопков, Вячеслав Иванов, Альберт Орлов.
Оҕолорго эҕэрдэ тылларын анаатылар уонна махтал суруктарын туттардылар "Хомустаах Бастакы" нэһилиэгэ МТ баһылыга В.Г. Жирков, "Нам улууһа" МТ культураҕа уонна духуобунай сайдыыга управлениятын начальнигын солбуйааччы А. Н. Новгородова. “Алгыс” норуот айымньытын киинин аатыттан (директор А. Г. Мылаханова) махтал суруктары, сибэкки дьөрбөтүн выпускниктар төрөппүттэригэр уонна кылаас салайааччыларыгар туттарда. Ансаамбыл салайааччылара Т. Ф. Филиппова, Н. И. Ощепкова, А.Н. Охлопкова оҕолорго ансаамбылы түмүктээбит туоһу суруктары, анал бэлиэни уонна хаартыска, видео архивын туттардылар. Ансаамбыл төрүттээччитэ А.Н. Окоемов бииргэ үөрэммит доҕотторун аатыттан сылын аайы туттарыллар анал стипендияларын туттулар- выпускниктар Алина Рожина, Альберт Орлов. “Мичээр” коллектива олохтообут “Бастыҥ иитиллээччи” анал номинация кыайыылаахтарынан Соловьев Георгий, Лиханова Кристина ааттаннылар. Дьиэ кэргэн сылынан удьуор утум үҥкүүһүттэр “Үҥкүү алыбар уйдаран” анал номинацияны туттулар Елена Михайловна кыыһа Күннэй Табунановтар ансаамбыл 2000 уонна 2024 сыллаах выпускниктара, Гавриил Николаевич уонна кыыһа Алиада Оконешниковтар ансаамбыл 1994 уонна 2024 сыллаах выпускниктара, Нюргуяна Руслановна Сысолятина уола Альберт Орловтуун ансаамбыл 1993 уонна 2024 выпускниктара. Выпускниктар төрөппүттэрэ ансаамбыл уһуйааччыларыгар бэлэхтэрин, ансаамбыл үлэтигэр көмө буолбут дьоннорго сибэкки дьөрбөтүн туттардылар. Быйылгы выпускниктар уон сыл устата нэһилиэк, улуус, республика ыытар тэрээһиннэригэр кыттыыны ылан, дойду араас куораттарыгар саха үҥкүүтүн кэрэтин көрдөрөн, билиһиннэрэн кэллилэр. Үҥкүү спорт кэриэтэ элбэх сыраны эрэйэрин, эттэринэн- хааннарынан билэн улааттылар. Бу сыллар устата үлэлэригэр бэриниилээх хореографтарга Эдуара Сергееваҕа, Алена Охлопковаҕа, Туяра Моховаҕа, Сардаана Березкинаҕа уһуйуллубуттара инникитин даҕаны Кэрэ эйгэни кытары ситимнии туруоҕа. Үҥкүү киэһэтэ көрөөччү ытыс дохсун тыаһынан быйылгы выпускниктар толорууларыгар, ансаамбыл биир бастыҥ “Уһун суһуох” үҥкүүтүнэн түмүктэннэ.
Комментариев нет:
Отправить комментарий