МБУ ЦНТ "Алгыс" с. Кысыл- Сыр, Намского улуса

  

    Сөрүүн салгыннаах үтүө- мааны сайыҥҥы күн   Бастакы Хомустаах нэhилиэгин Уйгу быйаҥ ыhыа5а ыhылынна, баhылык Василий Гаврильевич Жирков  дьөhөгөй о5отун миинэн  Ытык дуо5аны күөрэччи аста,  барыта этэҥҥэ буолууну түстээн кырылыы кыынньар кымыс үрдүн охтордо…

     Бэс ыйын 17 күнүгэр  Бастакы Хомустаах нэhилиэгин Υрүҥ Тунах Ыhыа5а нэhилиэкпит дьонун- сэргэтин, биир дойдулаахтарбытын, ытык- мааны ыалдьыттары түмэ тарта. Быйылгы Ыhыах нэhилиэккэ А5а сылыгар ананан ыытылынна. Ол курдук,  ыhыах аhыллыытын сиэригэр - туомугар нэhилиэкпит салайааччылара,  нэhилиэкпититтэн куорсун анньыммыт улууска, республика5а таhаарыылаахтык үлэлии сылдьар эр бэртэрэ түhүлгэ киин сиригэр сомо5о хааман киирдилэр. Ыhыах аhыллыытын сиэрэ - туома добун оhуохайынан түмүктэннэ, салгыы үөрүүлээх чааска СР Υлэ сылынан өр кэмҥэ таhаарылаахтык үлэлээбит нэhилиэкпит олохтоохторо бэлиэтэннилэр. Ыhыах түhүлгэтин  мааны ыадьыттарынан буоллулар СР Ил Түмэн мунньа5ын председателэ Алексей Ильич Еремеев, «Нам улууhа» МТ баhылыгын солбуйааччы Филипп Васильевич Николаев, «Нам улууhа» МТ депуттаттарын сэбиэтин председателэ Алексей Николаевич Винокуров. 

   Самаан сайыны уруйдуу көрсөр ыhыах  киин түhүлгэтигэр  "Махсыым ыччаттара"  эр дьон вокальнай ансаамбыла, А.Окоемов аатынан "Мичээр" ΥНА, "Күнчээн" үҥкүү коллектива кыттыылаах "Көмүс түгэн" э5эрдэ кэнсиэр, нэhилиэккэ  А5а сылынан "А5а уонна уол -  көлүөнэ ситимэ" күрэх,  "Бастыҥ биилээх - саха быhа5а" уустар күрэхтэрэ  ыытылыннылар.  О5олорго сүүрүүгэ, хапса5айга, мас тардыhыыга, тарбах тардыhыы   спортивнай күрэхтэр, улахан дьонҥо хапса5ай көрүҥэ ыытыллан кыайыылаахтар ааттаннылар. 

   "А5а уонна уол - көлүөнэ ситимэ"  күрэхххэ биэс хамаанда кыттыыны ылбытыттан  бастакы миэстэни Юрий, Равиль Николаевтар  ситиhэн ООО  "Прогресс" хампаанньа ( сал. Пинигин А.С.)  олохтообут мотоцикл бирииhинэн на5араадаланнылар, иккис миэстэ5э Андрей, Валерий Винокуровтар  "Эр сомо5о" общественнай түмсүү ( сал. Захаров А.А.)  олохтообут 20 тыh. солк. уу харчыны бэлэх туттулар, үhүс миэстэ5э Сандал, Сайдам Шараповтар тахсаннар  " Эр сомо5о" общественнай түмсүү олохтообут 15  тыh. солк. уу харчынан бэлэх  туттулар. Актыыбынай кыттыыны ылбыт Иван, Радислав  Егоровтар, Станислав, Сандал Соловьевтар ООО "Гранд" ( сал. Прокопьев С.К.)  тэрилтэ олохтообут сыаналаах бириистэринэн на5араадаланнылар, бары кыайыылаахтарга  түөлбэ салайааччылара түөлбэ олохтоохторун аатыттан  бэлэх туттардылар. 

 

"Бастыҥ биилээх- саха быhа5а" аhађас тимир уустарын күрэ5э ыhыахпыт түhүлгэтигэр аан бастакытын ыытыллан дьон интэриэhин тарта. Ол курдук,  бу күрэххэ кыттыыны ыллылар биэс  уус. Намтан Анатолий Брызгалов, Дьокуускай куораттан Илья Готовцев, Бастакы Хомустаахтан Родион Охлопков, Таастаахтан Максим Попов, Намтан Александр Михайлов.  Уустар оҥорон а5албыт быhахтарын биэс араас көрүҥҥэ тургутан көрдүлэр. Түмүккэ бастакы миэстэ5э Анатолий Брызгалов тахсан биир дойдулаахпыт Георгий Дмитриевич  Алексеев үлэлиир ООО "Восток -Капитал" ( сал. Тимофеев Н.П.)  тэрилтэтин аатыттан 30 тыh.солк.  "Охотный двор" ма5аhыынна сертификат тутта, иккис  мисэтэни Илья Готовцев ситиhэн  Алын Таастаах   Дүлүн  уус   Жирковтар сыдьааннарын ааттарыттан 26 тыh.солк. уу харчынан бириэмийэ тутта. Υhүс миэстэ5э Максим Попов тахсан биир дойдулаахпыт улуус мунньа5ын депутата  Степанов Николай Николаевич анал бирииhинэн на5араадаланна. "Кэскиллээх уус" анал ааты Родион Охлопков, "А5ам саастаах уус" анал ааты Александр Михайлов ыланнар олохтоох дьаhалта, "Алгыс" НАК олохтообут бириистэринэн на5араадаланнылар. Күрэ5и суруннээччилэринэн  нэhилиэкпит уус уолаттара, "Тимир устара" союз чилиэннэрэ  Михаил Баишев, Андрей Винокуров. Сыаналыыр сүбэ5э үлэлэстэ кырдьа5ас уус, саха тимирин оҥоруутун тар5атаачччы, Ил Дархан стипендията Прокопий Саввич Ильин.

 

    Кэрэ көстүүлээх ойуур са5атыгар турар То5ой сэлэ түhүлгэ5э  Х - төгүлүн ыытыллар аhа5ас  "Төрүт дор5оон түhүлгэтэ" фольклор күрэ5э  кыттыылаахтары түмэ тарта. Сыаналыыр сүбэ5э үлэлээтилэр: тойуксут, хас да төгүллээх тойук күрэхтэрин кылаан  кыайыылаа5а Ирина Николаевна   Николаева, Олоҥхо тыйаатырын артыыската, олоҥхоhут  Яна Петровна Нюргусова, Дьокуускай куорат «Арчы»  дьиэтин иhинэн үлэлиир "Күн дьоно" фольклор бөлө5үн салайааччыта , СР Культуратын туйгуна Евдокия Ивановна Павлова. Түмүккэ улахан дьонҥо Кылаан кыйыылаах аатын Елена Охлопкова (Бастакы Хомустаах нэh.)  ылан телевизорынан на5араадаланна, о5олорго Кылаан Кыайыылаах аатын Алмаз Попов ( Дьокуускай куорат) ылла. Кыттааччылар истэриттэн бастыҥ олоҥхоhукка, тойуксуттарга,  чабыр5ахсыттарга анал аттар туттарылыннылар  уонна  күрэх ааптара, "Алгыс" НАК фольклорга специалиhа Елена Руфова, Яна Нюргусова, Ирина Николаева,  "Арчы дьиэтэ" олохтообут бириистэрин туттулар. 

    Саха кыыhа  субуллар уhун суhуо5а хайа да кэмҥэ киhи санаатын көнньүөрдэр, хара5а  хайгыы көрөр кэрэ көстүүтэ буолар. Кырачаан кыргыттарга "Уhун суhуох" күрэх олус долгутуулаах буолла. То5ус  кыттааччыттан саамай уhун суhуохтаахтарынан ааттаннылар Виктория Архангельская, Чэмэлиинэ Протопопова, Нелли Федотова, Күннэй Торговкина. 

    "Сахам мааны талба таҥаhа" саха таҥаhын күрэ5эр дьиэ кэргэнинэн кыттыы биhирэннэ. Бу күрэскэ сыаналыыр сүбэ5э үлэлээтилэр норуот уус- уран оноhуктарын маастара, "Сайдыы" ОАДЬ педагога Варвара Дмитриевна Баишева, иистэнньэн Татьяна Филипповна Лаврентьева, иистээньэн, "Алгыс" НАК специалиhа Анастасия Касьяновна Барашкова. Түмүккэ бастакы миэстэни Мартыновтар, иккис миэстэни Новгородовтар,  үhүс бириистээх  миэстэни Павловтар дьиэ кэргэн ыллылар. 

    Махтанабыт  ыhыах ыытыллыытыгар күүс -көмө буолбут нэhилиэкпит олохтоохторугар, үгүс үҥкүүнү, ырыаны -  тойугу бэлэхтээбит ыччаттарбытыгар,    бириис туруорбут спонсордарга, биир дойдулаахтарбытыгар! Ыhыахпыт хас биирдиибит сүрэ5ин сылааhынан угуттаатын, уйгу- быйаҥ олохтоннун!