- Кулун тутар 12 күнүгэр улуустааҕы нэһилиэктэр икки ардыларыгар уус-уран самодеятельность фестивалын көрүү бастакы түһүмэҕэ ыытылынна.Биһиги нэһилиэкпит улахан дьон толоруутугар "Оһуор үҥкүүнэн", "Күнчээн" үҥкүү бөлөҕүн толоруутугар " Ойуоккалаан оонньуурдар " үҥкүүлэринэн уонна эр дьон ансаамбылын толоруутугар "Суох буоллун сэрии" ырыанан ситиһиилээхтик кытыннылар. Сольнай ырыаны толорууга кытынна Радомир Лиханов. Бу күннэргэ фестиваль иккис түһүмэҕэр кыттыы бэлэмнэнэниитэ бара турар.
- Кулун тутар 14 күнүгэр биир дойдулаахпыт Евдокия Романовна Леонтьева- Корякина5а көмөлөһөр сыаллаах "Күн киһитэ көмүскэс, айыы киһитэ аһыныгас" аһымал акция кэнсиэр ыытылынна. Биир дойдулаахтарбыт, нэһилиэкпит олохтоохторо, эстрада ырыаһыттара кыттыыны ыланнар күүс - көмө буоллулар. Кэнсиэр М.К.Аммосов аатынан Культура уонна духуобунай сайдыы дыбарыаһыгар ыытылынна. Махталбытын биллэрэбит директор Жирков Николай Михайловичка.
- Кулун тутар 15 күнүгэр П.И. Сивцев аатынан историко - этнографическай музей быыстапкатын саалатыгар СР уус- уран оҥоһуктарын маастара, СР культуратын туйгуна, РФ худуоһунньуктарын союһун чилиэнэ Яна Петровна Орлова өр сыллаах, айымньылаах үлэтин бииргэ түмэн "Ииһим абылаҥар ылларан" дьоро түһүлгэтэ ыытылынна. Кыттыыны ыллылар Яна Петровнаны кытта араас кэмнэргэ бииргэ үлэлэспит үөлээннээхтэрэ, сахалыы сону сэргээн , маанылаан кэтэр республикабыт улуустарыттан кэлбит Далбар Хотуттар. Кэлбит ыалдьыттар Яна Петровна уран тарбахтарынан тикпит сахалыы соннорун кэтэн дьоҥҥо- сэргэ5э көрдөрдүлэр.
- Бу күн Нам улууһун нэһилиэктэрин айар бөлөхтөрө, ырыаһыттара, талааннаах ыччата түмсэн байыаннай дьайыы кэккэтигэр сылдьар биир дойдулаахтарбытын өйүүргэ туһуламмыт марафон- кэнсиэр тэрийдэ. Биһиги нэһилиэкпититтэн Мичил Иннокентьев кыттыыны ылла.
- Кулун тутар 16 күнүгэр Нам улууһун кыраныыссатыгар Бастакы Хомустаах нэһилиэгэ Аан дойдутааҕы "Душа России" фестиваль делегациятын сахалыы сиэринэн айах тутан көрүстэ. Кулун тутар 19 күнүгэр "Душа России" фестиваль үөрүүлээх сабыллыытыгар "Иис Куо" түмсүү ( сал. А.Барашкова) кыттыыны ылла, Россия араас куораттарыттан кэлбит маастардар оҥоһуктарын билистилэр.
- "Уруйдан , Улуу Олонхобут!" олоҥхону үгэс быһыытынан биирдиилээн уонна куолаан толорууга аһаҕас өрөспүбүлүкэтээҕи ХVIII- с бэстибээлгэ "Алгыс" олоҥхоһуттар бөлөхтөрө ( сал.Руфова Е.И) БАСТАКЫ ҮРДЭЛИ ылла.
Комментариев нет:
Отправить комментарий