Олоҥхо декадата

          «Олоҥхо куттаах нэһилиэкпит дьоно» анал таһаарыы

Николаева Наталия Анатольевна- Тускууна, культуролог, этнопедагог, уйул5аһыт, дьөһүөлдьүт, Айыы түһүлгэтин Бахсыта, саха сиэрин-туомун, итэҕэлин тарҕатааччы далааһыннаах үлэлээх. Наталия  тойуксут, олоҥхоһут, хомусчут, ырыаһыт, үҥкүүһүт, норуот ырыаларын толорооччу дэгиттэр талааннаах киһи буолар. “Алгыс” олоҥхоһуттар бөлөхтөрүн уонна “Мэскэйдэр” драмкружок көхтөөх кыттыылааҕа буолар. Араас күрэхтэргэ, бэстибээллэргэ, ыһыахтарга кыттан нэһилиэгин чиэһин көмүскээбитэ, үгүс элбэх кыайыыны ситиспитэ, наҕараадалары туппута. Бэйэтин туһунан маннык кэпсиир: “Мин бастаан ырыаҕа – тойукка сыстыым”Мичээр” ансаамбылтан саҕаламмыта. 1989с. Александр Окоемов “Оһуохай”диэн үҥкүү туруорбута. Онно оһуохай толорор оҕо көрдөөбүтэ. Миигин аҕаҥ ыллыыр, онон эн да ыллыыр буолуохтааххын диэн үтүгүннэрбитэ уонна кылыһах баар эбит диэн “Дом пионеров”аттыгар олорор Марфа Новгородоваҕа илдьэ тахсыбыта. Бу кыыһы ыллыырга үөрэт эрэ кылыһахтаах дии диэбитэ. Манна миигин оһуохайга үс дуу, биэс дуу күн үөрэппитэ, дьарыктаабыта. Онтон ыла оһуохайдыыр буолбутум. Кэнники Яна Петровна Орлова тойукка “Сайдыы” Оҕо Айымньытын дьиэтин иһинэн үлэлиир “Умсулҕан” диэн кружогар үөрэппитэ. Оскуола иһигэр араас күрэхтэргэ, кэнсиэрдэргэ кыттарым. Республикаҕа, улууска миэстэлэһэ сылдьыбытым. Оскуолабын бүтэрэн баран Дьокуускайдааҕы Культура уонна Искусство колледжыгар туттарсан киирэрбэр, аҕам монолог суруйбута “Өлүөнэ эбэ”туһунан. Ону Яна Петровна дьарыктаабыта уонна дьэ олонхону үөрэппитэ. Сааһы быһа дьарыктаммытым,олоҥхону оруолларынан туойарга үөрэммитим. Онтон ыла кыралаан олоҥхолуубун.” Дьэ бу курдук, Наталия айар, ыллыыр-туойар, олоҥхолуур умсулҕаҥҥа уһуйуллан, билигин саха итэҕэлин, сиэрин-туомун дьоҥҥо-сэргэҕэ тарҕатааччы, үөрэтээччи буолла. Үгүс элбэх семинардары, анал биэриилэри, эбии үөрэхтэри тиһигин быспакка ыытар. Үс уол уонна кырачаан кыыс истиҥ-иһирэх ийэтэ буолар, оҕолорун эмиэ саха култууратыгар, итэҕэлигэр сыһыаран иитэр.