Олоҥхо- cаха норуотун барҕа баайа, кэрэ киэргэлэ, албан айымньыта, күндү кылаата.
Быйыл Өрөспүүбүлүкэбит үрдүнэн Олоҥхо декадата уонна хомус күннэрэ куйаар ситиминэн киэҥ ис хоһоонноохтук, далааһыннаахтык ыытылыннылар. Араас күрэхтэр, семинардар, төгүрүк остуоллар, быыстапкалар, маастар-кылаастар буоллулар.
Биһиги нэһилиэкпитигэр эмиэ "Aлгыс" НАК, модельнай библиотека, "Сайдыы" ОАДь тэрийиилэринэн куйаар ситимнэрин нөҥүө араас тэрээһиннэр ыытылыннылар.
Сэтинньи 23 күнүгэр Нам улууһун Ытык киһитэ, СР Култууратын үтүелээх үлэһитэ, хомусчут-импровизатор, норуот ырыаһыта, олоҥхоһут Кривошапкин Д.И.кыттыылаах "Орто дойду олоҥхото" диэн видеоролик "Aлгыс" НАК инстаграм сирэйигэр көһүннэ. Бу күн "Алгыс-кэрэ эйгэ" ютуб канаалга нэһилиэкпит киэн туттар ыччата, эдэр талааннаах олоҥхону толорооччу, элбэх өрөспүүбүлүкэтээҕи олоҥхо курэхтэрин кыайыылааҕа Яна Ньургусова "Дьырыбына Дьырылыатта" олоҥхону толорорун сэҥээрэ кердүбут, дуоһуйа иһиттибит.
Сэтинньи 24 күнүгэр- 2016 сыллаахха бөдөҥ политическай уонна государственнай деятель И.Е.Винокуров үбүлүөйдээх 120, биллиилээх олоҥхоһут П.П.Ядрихинскай-Бэдьээлэ 115 сылларыгар анаммыт, Нам улууһун нэһилиэктэрин икки ардыларыгар ыытыллыбыт уус-уран самодеятельность бэстибээлигэр "Бастыҥ Олоҥхо" ааты сүкпүт, биьиги нэьилиэкпит талба-талааннаах олохтоохторо кыттыылаах "Дьырыбына Дьырылыатта Кыыс Бухатыыр" уус уран туруорууну "Сайдыы" ОАДь "Ыллык" телестудия ютуб канаалыгар киирэн көрдүбүт.
Сэтинньи 24-30 күннэригэр олохтоох модельнай библиотека тэрийиитинэн Д.Ф.Алексеев аатынан орто оскуола 5-11 кылаастарын үөрэнээччилэригэр ЗУМ платформа нөҥүө тургутук ыйытыктарга викторина, уруһуйунан олоҥхо геройдарын хоһуйуу конкурс, "Өркөн өй күрэҕэ" интеллектуальнай оонньуу, маастар-кылаастар, олоҥхо дьыктаана бэрт тэрээһиннээхтик ыытылыннылар.
Олоҥхо декадатын чэрчитинэн «Алгыс" саайтыгар ыытыллыбыт "Олоҥхо туһунан тугу билэбит?" викторинаҕа нэһилиэкпит олохтооҕо Аан Арыйаана Болло кыыһа кыайыылаах үрдүк аатын сүктэ.
Сэтинньи 30 күнүгэр Өрөспүүбүлүкэбит үрдүнэн Хомус күнүгэр аналлаах онлайн тэрээһиннэр үрдүк таһымнаахтык ыытылыннылар. Бу күн нэһилиэкпит баьылыга Жирков В.Г. уонна тэрилтэлэр салайааччылара, профсоюз председателлэрэ бу бэлиэ күнүнэн эҕэрдэлээн тураннар, хомуска оонньооһуну пропагандалыыр сыаллаах "Хомус-челлендж" устан "Алгыс"НАК инстаграм ситимигэр таьааран, дьон
биһирэбилин ыллылар.
Ону таһынан, Өрөспүүбүлүкэтээҕи "Муҥха олоҥхото"эдэр олоҥхоһуттар бэстибээллэригэр Яна Ньургусова 1миэстэ буолла. "Уруйдан, Улуу Олоҥхобут!" өрөспүүбүлүкэтээҕи курэххэ "Алгыс" НАК фольклорга специалиһа Руфова Е.И."Кэскиллээх олоҥхоһут" анал ааты, "Олоҥхо тойуктара" өрөспүүбүлүкэтээҕи курэххэ 2-с миэстэни ылары ситистэ. Кыайыылаахтар дипломнарынан, сыаналаах бириистэринэн наҕараадалыннылар.
Үйэлэргэ сүппэккэ-симэлийбэккэ үүнэ-сайда тур Улуу Олоҥхобут!
Комментариев нет:
Отправить комментарий