Быйыл 2026 сыл Арассыыйаҕа Норуоттар сомоҕолоһууларынан уонна Өрөспүүбүлүкэбитигэр Култуура сыла дьүөрэлэһэллэрэ элбэҕи этэр. Ол курдук , улууспут үс улахан нэһилиэктэрин култууратын үлэһиттэрэ - "Чороон" НАК ( директор СӨ култууратын туйгуна Саргылана Даниловна Понамарева) "Түһүлгэ" НАК (директор СӨ култууратын туйгуна Антонина Алексеевна Харитонова , "Алгыс" НАК ( директор СӨ култууратын туйгуна Анна Григорьевна Мылаханова) биир сүбэҕэ кэлэн үс нэһилиэккэ "Үс күүс- биир тыын" улахан кэнсиэри бэлэхтээтилэр.
Бырайыак сүрүн идеятын сүрүннээччилэр Хатыҥ-Арыы нэһилиэгин "Чороон" НАК үлэһиттэрэ. Ол курдук, алтынньы 30 күнүгэр, киэһэ 19:00 ч. Хатыҥ - Арыы "Чороон" норуот айымньытын киинигэр дьон -сэргэ сааланы толору мустан кэнсиэри биир тыынынан астына көрдүлэр. Алтынньы 31 күнүгэр Хамаҕаттаҕа "Түһүлгэ" норуот айымньытын киинигэр, киэһэ 18:00 ч. дьон тоҕуоруһа муһунна. Көрөөччү хас биирдии нүөмэри сыныйа көрөн, күүстээх ытыс тыаһынан көрсөн, атааран олус истиҥ, сылаас сыһыаннаах кэнсиэр буолла. Сэтинньи 1 күнүгэр, киэһэ 18:00 ч. "Алгыс" норуот айымньытын киинигэр түмүктүүр кэнсиэри култуура үлэһиттэрэ биир тыынынан түһүнэн кэбистилэр. Бу күн икки күнү быһа чочуллубут нүөмэрдэр, өссө тупсан, киэркэйэн, сытыырхайан дьон көрүүтүгэр таҕыстылар. Бэлэмнэнии кэмнэрэ, үс күн устата ыытыллыбыт кэнсиэрдэр хас биирдии култуура үлэһитигэр саҥа тыыны сахта, дуоһуйууну аҕалла, ыкса доҕордуу сыһыаны үөскэттэ, маны сэргэ эдэр специалистарга үлэни көдьүүстээхтик саҕалыылларыгар бигэ тирэх буолла.
Комментариев нет:
Отправить комментарий