"Алгыс" норуот айымньытын киинэ быйылгы айар үлэ сезонун алтынньы ый 10 күнүгэр үөрүүлээхтик арыйда. Өрөспүүбүлүкэҕэ Култуура сылынан, тэрээһин сүрүн тутула - култуура эйгэтигэр үлэлиир биир дойдулаахтарбытын айар коллективтарынаан түмэ тардыы буолла.
Тэрээһин нарын музыка тэтимигэр уот күүһүнэн күлүгү туһанан, култуура араас эйгэтин этюд оҥорон көрдөрүүттэн саҕаланна - А.Окоемов аат. "Мичээр" оҕо үҥкүү народнай ансаамбыл иитиллээчилэрэ Сахаяна Попова, Сайыына Данилова, Сайаана Васильева, Сардаана Петрова нарын хамсаныынан арыйдылар.
Салгыы нэһилиэкпит култуура эйгэтин коллективтара "Алгыс" норуот айымньытын киинэ (дир. А. Г. Мылаханова), З. П. Винокуров аат. Намнааҕы оҕо искусство оскуолатын 1 - Хомустаахтааҕы филиала (сэб. Т. Е. Бережнева), "Эйгэ" саҥа көлүөнэ модельнай библиотеката ( сэб. Н. Д. Жиркова) айар үлэ сезона саҕаламмыт бэлиэтинэн сомоҕо хааман тахсыылара буолла. Дьоро киэһэни иилээн - саҕалаан ыыттылар - А. Шестаков аат. улуустааҕы норуот айымньытын дьиэтин специалиһа, биир дойдулаахпыт Мария Парникова, өрөспүүбүлүкэтээҕи ырыа күрэхтэрин лауреата Артем Тюкянов.
Быйыл “Алгыс” НАК саҥа специалистар үлэлэрэ айымньылаахтык саҕаланна, ол курдук - уус-уран салайааччы Нарыйаана Уодай, вокал специалиһа – СӨ Үөрэҕириитин туйгуна Нюргуяна Сивцева, звукооператор- Ариан Вырдылин. Саҥа специалистар көрөөччү ытыс дохсун тыаһынан эҕэрдэ нүөмэрдэрин бэлэх ууммуттара сонун көстүү буолла.
Үҥкүү - үөрүү, көтүү, үрдүк үктэл диэн мээнэҕэ эппэттэр. Бу күн биир дойдулаахтарбыт салайар айар коллективтара чаҕылхай үҥкүүлээри көрдөрдүлэр: А. Окоемов аат. “Мичээр” народнай үҥкүү ансаамбыла (сал. К. Борисов), Оҕо искусствотын оскуолатын иһинэн айымньылаахтык үлэлиир “Күнчээн” үҥкүү образцовай коллектива (сал. СӨ Культуратын туйгуна Т. Мохова), З.П. Винокуров аат. Оҕо искусствотын оскуолатын “Грация” үҥкүү коллектива (сал. СӨ култууратын туйгуна С. Кудрина), Партизан нэһилиэгин “Хомус ” фольклор дьиэтин иһинэн үлэлиир “Күбэйэ” ансаамбыл, саҥа тэриллибит "Дойдууна" үҥкүү бөлөҕө ( сал. Нь.Сысолятина).
Нэһилиэкититтэн култуура эйгэтин талан, үгүс ыччаппыт үөрэнэ, үлэлии сылдьаллара хайҕаллаах суол. З.П. Винокуров аат. оҕо искусствотын оскуолатын 1-кы Хомустаахтааҕы филиалын фольклорнай кылааһын уһуйааччыта, саха ырыатын-тойугун, үгэһин өрө туппут, талааннаах уолбут Урсун Винокуров , НВК "Саха" көрдөрөр- иһитиннэрэр хампаанньа "Тэтим" радио үлэһитэ Айыына Татаринова эҕэрдэлэрэ көрөөччү биһирэбилин ыллылар.
Бу киэһэ мааны куоластаах ыалдьыттарбыт СӨ култууратын туйгуна Николай Жирков, Артем Тюкянов, Мария Парникова ылбаҕай ырыаларынан айар киэһэни киэргэттилэр. Түмүккэ "Алгыс" НАК коллектива алгыстаах ырыалара ыраахха дуорайда. Култуура - дьону түмэ тардар сүдү күүс, сайдыыга бигэ тирэх !
Комментариев нет:
Отправить комментарий