МБУ ЦНТ "Алгыс" с. Кысыл- Сыр, Намского улуса

 

Бастакы Хомустаах субуруйа сытар мыраан анныттан саҕалаан, Өлүөнэ эбэ кытылынан нэлэһийэн, былыр - былыргыттан уос номоҕо буолан, кэпсээҥҥэ кэпсэнэн, сэһэҥҥэ сэһэргэнэн, хоһооҥҥо хоһуйуллан мааны да сир!  Аара айан  суолун тутан истэххэ,   элэҥнээн ааһар кэрэ бэйэлээх көстүү - бэйбэрэспит бэстэр, ханыылаһа үүммүт  хатыҥнар, тэлибирии тэлэҥниир тэтиҥнэр, ойуолаһа турар иирэ талах мастар. Айылҕа  анаан оҥорбут Хос Мыраана хас биирдии ааспыт киһиэхэ умнуллубат дьикти көстүүнү бэлэхтиир, арчылыыр. Дьэ, ити доҕоттоор, биһиги төрөөбүт төрүт түөлбэбит  Нам улууһун Аан нэһилиэгэ – Бастакы Хомустаах. Манна олох – дьаһах ньиргийэр, үөрүү-көтүү көтөҕүллэр, үлэ-хамнас оргуйар, ырыа – тойук дьиэрэйэр !

Oлунньу ый 19 күнүгэр Модун Арассыыйаҕа норуоттар сомоҕолоһууларын, СӨ Култуура сылынан, нэһилиэкпитигэр Нам улууһун I-кы баһылыга, дьоһуннаах салайааччы Д. Ф. Алексеев төрөөбүтэ 90 сылын көрсө “Үлэ уонна бигэ турук” сылынан « ТУЙМААДА ТУОНАТЫГАР - БАСТАКЫ ХОМУСТААХ» үтүө түһүлгэ  Дьокуускай куорат "Сэргэлээх уоттара" КК үрдүк таһымҥа ааста.  Бу күн күнүс 14:00 ч.  М. К. Аммосов аат. ХИФУ библиотекатыгар  нэһилиэк баһылыга  В.Г. Жирков салайааччылаах "Нэһилиэк  сайдар саҕахтара" төгүрүк остуол  тула кэккэ боппуруостарга кэпсэтии ыытылынна. Кыттыыны ыллылар биир дойдулаахтарбыт:

- СӨ " Ил Түмэн" мунньаҕын депутата Атласов Александр Павлович.

- "Нам улууһа" МО Тыа хаһаайыстыбатын боппуруостарыгар баһылык солбуйааччыта Николаев Филипп Васильевич

-  Улуус ветеринарнай сулууспатын начальнига  Николаев Павел Васильевич.

- "Нам улууһа" МО  баайын - дуолун салайар управлениятын директора Белолюбскай Святослав Святославович.

- Хаҥалас улууһун баһылыгын  социальнай  боппуруостарга солбуйааччы Степанов Николай Николаевич.

- Авиация бэтэрээнэ, авиатехник Артемьев Альберт Афанасьевич 

- ООО "Восток Капитал" тутуу директэрин солбуйааччы Алексеев Георгий Дмитриевич.

-  В. Манчаары аат. Республиканскай спорт төрүт көрүҥнэригэр,  мас- рестлинг маастара  Константинов Николай Элляевич.

- ГКУ «Служба государственного заказчика» директоры солбуйааччы  Гаврильев Дмитрий Александрович.

- «Биир дойдулаахтар» түмсүү салайааччыта Ядреева Элизабет Дмитриевна  уонна  нэһилиэк тэрилтэлэрин салайааччылара, депутаттар, устудьуоннар, араас хайысхаҕа  үлэлиир  исписэлиистэр. Кэпсэтии нэһилиэк инники сайдыытын, чуолаан саҥа оскуола тутуллуутун,  тыа хаһаайыстыбатын, сир боппуруостарын , спорт сайдыытын , анал байыаннай дьыала кыттыылаахтарын тула буолла. Төгүрүк остуол түмүгүнэн   былаан ылылынна.

Киэһээ 17.00 ч. «Сэргэлээх уоттара» КК  ыалдьыттары киирии ааҥҥа нэһилиэк депутаттара арыылаах алаадьынан айах тутан көрүстүлэр. Манна киирээти кытта "Айар  уус ситимэ" быыстапка үлэлээтэ, нэһилиэк олоҕун билиһиннэрэр кинигэ быыстапката турда. 

"Илгэ  Хотун" кооператив  ( сал. Сивцева О.В.)  бэйэ ынах- сүөһү этиттэн оҥоһуллубут полуфабриката, бурдук ас атыыта тардылынна.

З.П. Винокуров аат. Намнааҕы оҕо искусствотын оскуолатын 1-Хомустаахтааҕы филиалын уруһуй кылааһын үөрэнээччилэрин бастыҥ үлэлэрэ  дьон биһирэбилин ылыан ылла. "Сайдыы" оҕо айымньытын дьиэтин иһинэн үлэлиир  " Төрүт туос " , норуот маастара Варвара Баишева  салайан үлэлэтэр түмсүүтүн иистэнээччилэрэ туостан араас эгэлгэ иһити аҕалан туруорбуттарын бэрт элбэх киһи тутан-хабан, сэргии- хайгыы көрдө.

Д. Ф Алексеев аат. 1-Хомустаах орто оскуолатын үөрэнээччилэрэ илиинэн оҥорорго дьоҕурдарын сайыннарар үөрэх таһынан дьарыктарыгар оҥорбут оҥоһуктара хамаҕатык атыыланна. Маны таһынан Хомустаахпыт илиилэригэр талааннаах, бэйэлэрэ туспа көрүүлээх - Татьяна Филиппова, Анна Новгородова, Александра Данилова  оҥоһуктара атыыга турда.

Киэҥ уораҕайга үгүс көрөөччүнү түмэ тардыбыт үтүө түһүлгэ кэнсиэрэ сахалыы сиэринэн күөх буруону унаарытан арчынан саҕаланна. Түһүлгэни өбүгэ  төрүт тойугунан,   СӨ Олоҥхо театрын артыыһа, СӨ култууратын туйгуна Яна Нюргусова арыйда. Түһүлгэни СӨ уус-уран оҥоһуктарын маастара, СӨ Култууратын туйгуна, РФ худуоһунньуктарын союһун чилиэнэ Яна  Ядреева-Орлова  тикпит бууктаах сонноро  киэргэттэ. Нэһилиэкпит Өрөгөй ырыата Дьокуускай куоракка дуорайда. "Хомустааҕым -төрүт түөлбэм, Кыһыл - Сыырым» литературнай композицияны Д.Ф.Алексеев аат. орто оскуола хоһоонньут уолаттара толордулар (сал. СР Үөрэҕэриитин туйгуна" Томская А.А.).

       .

.

 

Бастакы Хомустаах нэһилиэгэ үҥкүүһүт нэһилиэгинэн ааттанар. Бу да киэһээ көрөөччү үрдүк таһымнаах үҥкүүлэри көрөн дуоһуйда. Ол курдук  А. Н. Окоемов аат. "Мичээр" ҮНА ( сүрүн хореограф Коҥстантин Борисов), ансаамбыл иһинэн үлэлиир "Чэмэлиинэ",  " Чэбдик" , "Күндүүнэ"  үҥкүү бөлөхтөрө - (сал.  Алена Охлопкова), "Күнчээн" образцовай оҕо үҥкүү коллектива  (сал. СӨ култууратын туйгуна Туяра Мохова)  үҥкүүлэри бэлэхтээтилэр.

СӨ  култууратын туйгуна Елена Руфова салайар  "Мэскэйдэр" көр - күлүү, "Алгыс" олоҥхоһуттар,  "Чугдаар"  чабырҕахсыттар бөлөхтөрө фольклор араас жанрын быһа тардан  көрдөрөн көрөөччү кутун туттулар. " Умсулҕан" фольклорнай студия иитиллээччилэрэ чабырҕахтарын чобуотук ааҕан, туттан -хаптан көрөөччү сүргэтин көтөхтүлэр (сал. СӨ  Үөрэҕэриитин туйгуна Александра Аргунова).

Хормейстер Марина Охлопкова салайар  'Татыйык", "Сарыада" ырыа ансабыллара уонна "Эр сомоҕо" эр дьон бөлөҕө, Радомир Лиханов бэрт долгутуулаахтык ыллаан эйээртилэр.

Маны сэргэ Туймаада туонатыгар олохсуйан олорор биир дойдулаахтарбыт  биллэр-көстөр    ырыаһыттар -  СӨ Култууратын туйгуна,  "Дуораан" ВИА солиһа  Николай Прокопьев,  "Туймаада" вокальнай ансаамбыл солистката, СӨ  Култууратын туйгуна Туяра Попова,  талааннах дьиэ  кэргэн Айыына,  Егор Ощепковтар, элбэх ырыа автора,  СӨ Ыччат политикатын туйгуна Кэскил Баишев кэнсиэри киэргэттилэр.

Түмүккэ,  Кэскил Баишев  "Дойдум салгына тыынна биэр" долгутуулаах ырыата барыбытын биир сомоҕо холбоон,  оҕотуттан кырдьаҕаһыгар тиийэ төрөөбүт түөлбэҕэ тапталы, дойдуга бэриниилээх буолууну өссө  төгүл иҥэрдэ. 

Кэнсиэри бэлэмнээтилэр "Алгыс" НАК коллектива, иилээн- саҕалаан  ыыттылар култуура киинин салайааччыта, СӨ  Култууратын туйгуна Анна   Мылаханова, СӨ Үөрэҕириитин туйгуна, РФ  үөрэҕиритиин Бочуоттаах үлэһитэ Александр     Колесов.

Сылааһынан угуттуур үтүө түһүлгэбит тэриллэригэр күүс көмө буолбут бар дьоммутугар махталбытын биллэрэбит! Тэрээһини хаартыскаҕа түһэрэн, видеоҕа уһулан  үйэтиттилэр Лена Корякина, Саша Копырин, Иван Николаев.