Сэтинньи 28 күнүгэр "Олоҥхо айана" бырайыак М. К. Аммосов төрөөбүт түөлбэтигэр Хатырык нэһилиэгэр айанын тутта.
Күн-дьыл туран биэрэн, былыттаах сылаас, кыраһа хаардаан суол устун хоп - хойуутук үүммүт харыйа мастар олоҥхоһуттары үөрбүттүү лаглаһан көрүстүлэр.
Манна Василий Николаевич Попов – Бочоох ( 1909 - 1985 с. с.),
"Үөлэн кыырдьыт", Мас суха", "Хатырыгым хочото", Афанасий Егорович Сивцев - Дьиибэ Бытык (1890-1952с.с.)"Туналҕаннаах туус маҥан аттаах Тойон Доҕуһуол бухатыыр», "Иирээннээх кутурааннаах Игирэ Хара» (Уус-Дьааҥы кырдьаҕас олоҥхоһутуттан) уонна бэйэтэ айбыт «Оҕо Одьунаас Бөҕө» олоҥхолоро алаас, алаас аайы дуораһыйдахтара. Кинилэр ырыалара, тойуктара, олоҥхолоро күн бүгүнүгэр дылы уостан түспэккэ ылланан билиҥҥи кэмҥэ дылы сүппэккэ кэллэҕэ.
Хатырыкка кэлбит ыалдьыт, үгэс курдук хайаан даҕаны М. К. Аммосов аатынан СӨ государственноһын түмэлиттэн саҕалаан, ол кэннэ аналаах тэрээһиҥҥэ тиийэр. Эрдэ сылдьыбыт да буоллаххына хаттаан историяны чиҥэтии буолар."Сайдам" култуура дьиэтин директора Елена Ефремова- Сэбэрэкэ Сандаарыйа Куо Алтай кыыһа ыалдьыттары аантан көрсөөт, саха үгэһинэн алгыс тылларынан үтүөнү түстээтэ, кэрэни кэрэһэлээтэ. Унаархай күөх буруонан арчылаатылар алаадьынан күндүлээн, итии үүттээх чэйинэн сылаанньыттылар.
Олоҥхону истиэх иннинэ Саха Далбар хотуттара кырыымпаҕа оонньоон, хомуһунан хоһуйан, кэлбит ыалдьыттары олоҥхо дойдутугар киллэрдилэр.
Оскуола оҕолоро олус болҕомтолоохтук, өйдөөн иһиттилэр. Көх-нэм буолан олоҥхо тыҥааһыннаах түгэннэригэр саҥа аллайан истилэр.
Бу курдук "Олоҥхо айана" бырайыага Олоҥхо декадатын Хатырык нэһилиэгинэн түмүктээтэ.
Сахалыы саҥа, сахалыы тыын, саргылана турдун!
Комментариев нет:
Отправить комментарий