Хас биирдии нэһилиэк олоҕо сайдарыгар, инники кэскилэ кэрэни кэрэхсииригэр, үтүөнү үксэтэригэр, талаан арылларыгар кулууп дьиэтин оруола улахан. Ол курдук, алтынньы 18 күнүгэр "Алгыс" НАК Ийэ күнүгэр аналлаах кэнсиэринэн үлэ сезонун арыйда.
Быйыл кулууп дьиэтигэр үлэ күргүөмүгэр түөрт саҥа үлэһит киирэн, тэбис- тэҥҥэ тэтими тутуһан үлэлээн-хамнаан бардылар. Ол курдук, кулууп үлэтигэр биир сүрүн үлэнэн уус-уран салайааччы буолар, манна Вячеслав Константинов , улахан экраҥҥа киинэ аныгылыы быһыынан нэһилиэнньэҕэ көстүүтүгэр эппиэтинэстээх Елена Корякина, хайа баҕар түгэннэргэ тэрээһин тыаһын-ууһун бэрийээччи Александр Рязанскай, тэрилтэ түүҥҥү кэмигэр хайа-баҕар өттүттэн куттала суох буоларыгар эппиэтинэстээх Николай Сивцев.
Хомустаах Бастакы нэһилиэгэ үҥкүүһүт нэһилиэгинэн аатырар. А.Н. Окоемов аатынан "Мичээр" үҥкүү народнай ансаамбыла, "Күнчээн" образцовай үҥкүү ансаамбыла кэнсиэри киэргэттилэр.
"Сайдыы" ОАДь иһинэн үлэлиир "Умсулҕан" фольклорнай студия иитиллээччилэрэ хомуска тыаһатан, күпсүүргэ дэбдигирэтэ охсо оонньоон атын тыыны көрөөччүлэргэ тириэртилэр.
Хайа баҕар кэнсиэргэ кэлбит ыалдьыт күлэн-үөрэн барарын ситистэххэ, кэлин да ыытыллар тэрээһиннэргэ саала иһэ көрөөччүнэн туолар. Ол курдук, "Мэскэйдэр" көр-күлүү мини театра куруук буоларын курдук көрдөөх сыанканан көрөөччү кутун туттулар.
Кэнсиэр биир кэрэ түгэнинэн саҥа тэриллибит "Ай - тик" мода театра кыргыттара бэйэлэрэ тикпит таҥастарын хааман көрдөрүүлэрэ буолла. Театр салайааччылара А. К. Барашкова, Т.А. Жиркова. Манна оскуола улахан кылааһын кыргыттара дьарыктарын саҕалаатылар, инникитин былааннара киэҥ.
Ыҥырыылаах ыалдьыттар Сайдам Мухин - Самадхи-Саки, Алмаас, Вера - Күн, "Эҥсиэли Хотуттара" вокальнай ансаамбыл, Аскалон Барашков -Аскалонидзе ылбаҕай ырыаларын бэлэхтээтилэр.
Бу курдук, Күн күбэй ийэлэргэ анаммыт кэнсиэр түмүктэнэн, көрөөччү даҕаны, кыттааччы даҕаны өрө көтөҕүллэн дуоһуйан тарҕастылар.
Комментариев нет:
Отправить комментарий