Аҕам саастаахтар күннэринэн алтынньы 2 ,3 күнүгэр нэһилиэкпитигэр "Алгыс" норуот айымньытын киинигэр "Ытык Эбэбит Үрүҥ Күөл күндү бэлэҕэ- Собо" диэн ааттаах
Түбэтээҕи "Үрүҥ Күөл" краеведческай гостевой балаҕана, "Собо" музейа быыстапканан ыалдьыттаата.
Быыстапканы М. Е. Охлопкова аатынан Түбэ орто оскуолатын "Букубаар" музейын педагог- библиотекара Марита Афанасьевна Сивцева салайар.
Үрүҥ Күөл көмүс хатырыктааҕын бултаабыт сэрии сылларыгар үгүс киһи тыынын өллөйдөөбүт "Балык артыала" тэриллибитэ 83 сылыгар ананар.
1942 сыллаахха Балык артыала тэриллэн нэһилиэктэртэн балыксыттар биригээдэлэрэ кэлэн, бу артыалы кытта "Барыта фронт туһугар, барыта Кыайыы туһугар" диэн турунан үлэлээбиттэр.
Музей сыала, соруга - Үрүҥ күөлгэ үлэлээбит, ол кэмнээҕи балыксыттар ааттарын билии, кинилэр олоро ааспыт олохторун, үлэлэрин үөрэтии, үйэтитии буолар.
Манна араас матырыйаалтан оҥоһуллубут Собо балык экспонаттара, балыкка туттулла сылдьыбыт тэриллэр көрөөччүлэри сөхтөрдө.
Ыалдьыттар "Күөгүлээ" диэн оонньууга оонньоон ыһаарыламмыт бөдөҥ собо бириис тутан үөрдүлэр. Ону таһынан, хас биирдии кэлбит ыалдьыт Үрүҥ Күөл эмис соботун миинин амсайан астыннылар.
Сүрүн билсии биир дойдулаахпыт "Букубаар" автора М. Е. Охлопкова Түбэ "Культура" диэн сиргэ Д. К. Сивцев - Суорун Омоллооннуун букубаары суруйууга хайдах үлэлээбиттэрин туһунан иһиттилэр.
М. А. Сивцева бу көһө сылдьар музейын Горнай, Кэбээйи, Ууус - Алдан улуустарынан Хатырык , Граф Биэрэгэ, Хамаҕатта, Таастаах нэһилиэктэринэн сылдьан оскуола оҕолоругар, нэһилиэнньэҕэ билиһиннэрбит.
Түмүккэ М. А. Сивцева бу хайысхатынан билигин да былаана элбэҕин, Собо балыкка сквер оҥоһуллуохтааҕын, үүчээн тутуллан экспоноттар онно харыллыахтаахтарын билиһиннэрдэ.
Комментариев нет:
Отправить комментарий