Улуу Кыайыы 80 сылын көрсөр тэрээһиннэр нэһилиэккэ былаан быһыытынан ыытылла тураллар. Ол курдук, "Кыайыы сааһа" сэлэлии хаамыыны ( парад), Кыайыы болуоссатыгар миитин, ветераннарга "Үйэ саас эһиэхэ махтал" күөх уот тэрээһиннэри бүгүн нэһилиэк сүргэтэ көтөҕүллэн көрүстэ. Сарсыардаттан нэһилиэк уулуссаларынан эҕэрдэ "Авто - радиорубка" үлэлээтэ. Бэлиэ күн үгэс быһыытынан сэрии ветераннарыгар анаммыт бастакы пааматынньыкка өйдөбүл, сүгүрүйүү бэлиэтэ венок ууруутуттан саҕаланна, онтон Кыайыы сааһын көрсөр киэргэммит колонналар "Ураа!" хаһыынан Кыайыы болуоссатыгар сэлэлии хаамтылар. Үөрүүлээх тэрээһиҥҥэ ыалдьыттаатылар биир дойдулаахтарбыт Ил Түмэн тыа хаһаайыстыбатын постояннай комитетын салайааччыта А.П.Атласов, "Нам улууһа" муниципальнай оройуон баайга - дуолга комитетын салайааччыта С.С. Белолюбскай. Тыыл ветераннара, сэрии сылын оҕолоро "Нам улууһа" МО баһылыга Ю.И.Слепцов, СӨ Ил Дархана А.С. Николаев бэлэхтэрин уонна үбүлүөйдээх знактары туттулар. Нэһилиэк баһылыга В.Г.Жирков, ветеран сэбиэтин председателэ З.Е.Ощепкова, ыччат аатыттан баһаарынай чаас байыаһа А.А.Охлопков эҕэрдэ тыл эттилэр. Бырааһынньыктааҕы парады салайда баһаарынай чаас байыаһа А.Г.Прибылых, эҕэрдэ нүөмэрдэринэн киэргэттилэр махталлаах көлүөнэ - оскуола үөрэнээччилэрэ, эдэр ыччаттар. "Эйэ дьол, иһин" күргүөмүнэн ырыа ылланна, "полевой кухня" үлэлээтэ, салгыы ветераннар "Күөх уот" бырааһынньыкка түмсэннэр эҕэрдэ кэнсиэри көрдүлэр, үлэ тэрилтэлэрин ааттарыттан бэлэхтэри туттулар. Тэрээһини хаартыскаҕа түһэрэннэр, видеолаҕа уһулан үйэтиттилэр биир дойдулаахтарбыт Саша Копырин, Иван Иванович Николаев.
Комментариев нет:
Отправить комментарий