Ыам ыйын 9 күнэ, Ытык күн! Бүгүн нэһилиэк бары олохтоохторо Улуу Кыайыы 79 сылын бэлиэтиир үөрүүлээх тэрээһиҥҥэ эдэрдиин, эмэнниин тоҕуоруһа муһуннубут.
Митинг Кыайыы Знамятын Д.Ф. Алексеев аат. орто оскуола үөрэнээччилэрэ күөрэччи тутан киириилэриттэн саҕаланна, ол кэннэ Кыайыы полотнотун кэнчээри ыччат чиэстээхтик тутан болуоссакка киирдилэр. Бары мустубут ветераннары, анал байыаннай дьайыы кыттыылаахтарын төрөппүттэрин нэһилиэк баһылыга В. Г. Жирков, ыччат лидерэ Е.А.Скрыбыкина, улуус дьаһалтатын иһинэн үлэлиир кадровой уонна наградной отдел начальнига, нэһилиэкпит куратора В.Ю. Винокурова, ветераннар сэбиэттэрин ааттарыттан М.П. Сысолятина эҕэрдэлээтилэр. Кыайыы күнүн уруйдуур тэрээһини, оскуола орто сүһүөх кылааһын оҕолоро ыллам ырыаларынан киэргэттилэр, ветераннарга уонна анал байыаннай дьайыы кыттыылаахтарын төрөппүттэригэр нэһилиэк тэрилтэлэрин ааттарыттан бэлэхтэр туттарылыннылар. Саллаат хааһытынан "Улыбка" уһуйаан кэлбит дьону күндүлээтилэр.
Салгыы " Түмсүү" балаҕаҥҥа Күөх уот бырааһынньыгар аҕам саастаах дьоммут ыллаан- туойан, бэйэ- бэйэлэрин кытта көрсөн, кэпсэтэн , сэргэхсийэн атаардылар. Эһиил Улуу Кыайыы 80 сылын нэһилиэккэ өссө өрө күүрүүлээхтик бэлиэтииргэ диэн баҕа санааларын эттилэр.
Комментариев нет:
Отправить комментарий