Улуустааҕы "Сылгыһыт күрэҕэ" тэрээһин "Кубалаах" ипподромҥа Бастакы Хомустаахтан, Модуттан, Үөдэйтэн, Хатыҥ- Арыыттан, Никольскайтан уопсайа алта хамаанданы түмтэ. Тэрээһин хамаандалар парадтарыттан саҕаланна. Алгыс сиэрин - туомун Никольскай нэһилиэгин баһылыга Алексей Карлович Кривогорницын ыытта.
Сыыдам аттар күөн көрсөр тыҥааһыннаах кэмнэригэр " Алгыс " НАК - гэр сылгы сиэлиттэн оҥоһуллубут, сиэлинэн киэргэтиллибит уус -уран оҥоһуктар быыстапкалара турда.
Манна нэһилиэкпит уран тарбахтаах Далбар Хотуттарын үлэлэрэ, ону сэргэ Партизан, Хамаҕатта нэһилиэгин маастардарын үлэлэрэ турда. Дьон - сэргэ интэриэһин тарта Хамаҕатта нэһилиэгин маастара Мария Николаевна Аманатова сиэлтэн баайан оҥорбут "Дьөһөгөйүн оҕото" . Маны сэргэ нэһилиэкпит олохтооҕо, уран тарбахтаах Ирина Ефимовна Москвитина "Үрүҥ сиэлтэн" харысхал оҥоруутугар маастар - кылаас ыытта.
Ипподромҥа күрэх кэнниттэн бука бары кыттааччылар, биир интэриэстээх сылгыһыт дьон аһаҕас кэпсэтиигэ муһуннулар. Тэрээһин ыалдьыта Өймөкөөнтөн дойду тэбэр сүрэҕэр Москваҕа тиийбит айанньыт, сылгыһыт Дугуйдаан Винокуровы кытта көрүстүлэр.
Түмүккэ кыайыылаах хамаандалар, биирдиилээн ат сүүрдүүтүгэр миэстэлэспит дьоммут спонсордар, тэрийээччилэр олохтообут бириистэринэн наҕараадаланнылар.
Ол курдук, "Сылгыһыт күрэҕин" кыайыылаахтарынан буоллулар 1 миэстэҕэ "Хомустаах Бастакы" нэһилиэгин 1-кы хамаандата, 2 миэстэҕэ Никольскай нэһилиэгин хамаандата, 3 миэстэ Хомустаах Бастакы нэһилиэгин 2 хамаандата.
Күрэххэ Таатта, Уус- Алдан, Дьокуускай куораттан кыттыыны ыла кэлбиттэрэ кэрэхсэбиллээх. Бука бары тэрээһин кыттыылаахтарын, ыалдьыттары ис миининэн, итии чэйинэн тэрийээччилэр күндүлээтилэр.
Күрэххэ нэһилиэкпитигэр өр сылларга сылгы иитиитигэр үлэлээбит дьоммут үтүө ааттарын үйэтитэр сыаллаах дьиэ кэргэттэрэ, аймахтара спонсордаатылар, улахан күүс - көмө буоллулар: Николаев П. Г. дьиэ кэргэнэ 30000 солк., Муксунов И.А дьиэ кэргэнэ 30000 солк., Охлопков Г. М. дьиэ кэргэнэ 17000 солк., Аргунов А.Т. дьиэ кэргэнэ 25000 солк., Григорьев П. Т. дьиэ кэргэнэ 30000 солк. , ону сэргэ Нэһилиэк сылгыһыттарын түмсүүтэ 25000 солк., "Дайар" СХПК 15000 солк., Посельский Л.М., Аргунов А.А . 10000 солк., Петров И.И. "Мakita" инструмент. Бары кыттааччыларга, спонсордарга барҕа махтал буолуохтун!
Саханы саха дэппит Дьөһөгөй оҕотун сулустаах чааһа, Бастакы Хомустаах маанылаах туонатыгар чаҕылыйа тыкта.
Комментариев нет:
Отправить комментарий