Сэтинньи 11 күнүгэр «Алгыс» норуот айымньытын киинигэр Өрөспүүбүлүкэтээҕи норуот айымньытын дьиэтин уонна
А.Н.Окоемов аатынан «Мичээр» үҥкүү народнай ансаамбыл тэрийиилэринэн «Үҥкүү алыптаах аартыга» орто уонна аҕам саастаах дьоҥҥо анаан аһаҕас үҥкүү күрэҕэ ыытылынна. Күрэххэ Дьокуускай куораттан, Хатастан , Горнай улууһуттан, Нам улууһуттан 12 үҥкүү коллектива, уопсайа 147 үҥкүүһүт кытынна. Бу күн сүүмэрдиир түһүмэх кэннэ Саха республикатын народнай артыыһа, Россия уонна Саха сирэ үтүөлээх артыыһа Афанасий Афанасьев күрэх кыттыылаахтарыгар анаан «Араас кэмнээҕи үҥкүүлэр» тиэмэҕэ сэргэх мастер-класс ыытта, ону тэҥэ «Мичээр» үҥкүү народнай ансаамбыл үлэлиир опытыттан үллэстэн “Саха үҥкүүтүгэр уол оҕону уһуйуу” аһаҕас уроктары көрдөрдүлэр.
Күрэҕи дьүүллээтилэр:
- Николай Николаевич Терютин – Өрөспүүбүлүкэтээҕи норуот айымньытын киинин специалиһа, РФ уопсай үөрэхтээһинин бочуоттаах үлэһитэ, СР культуратын, үөрэҕириитин, ыччат политикатын туйгуна, Учууталлар учууталлара бэлиэ хаһаайына.
- Афанасий Афанасьев – Россия уонна Саха сирин үтүөлээх артыыһа, Саха республикатын народнай артыыһа
- Мария Спартаковна Попова – Нам улууһун «Ньургуһун» үҥкүү народнай ансаамбыл салайааччыта, СР культуратын туйгуна.
«Үҥкүү алыптаах аартыга» үҥкүү күрэҕин муҥутуур кыайыылааҕынан Дьокуускай куораттан «Эрэл айар түһүлгэтэ» үҥкүү бөлөҕө ааттанна. Күрэх кыайыылаахтара сүрүн спонсор «Биир ньыгыл Россия» партияттан, Өрөспүүбүлүкэтээҕи норуот айымньытын дьиэтин уонна тэрийээччилэр ааттарыттан сыаналаах бириистэри туттулар.
Комментариев нет:
Отправить комментарий