Алтынньы 22 күнүгэр, "Алгыс" НАК быйылгы үлэ сезонун арыйар үөрүүлээх тэрээһинин Күн күбэй Ийэлэргэ анаммыт истиҥ кэнсиэринэн арыйда. Тэрээһини нэһилиэк баһылыга Жирков В.Г. ийэлэргэ анаммыт иһирэх ырыатынан саҕалаабыта саала иһигэр толору мустубут көрөөччү сүргэтин көтөхтө. Маны сэргэ саалаҕа олорор Күн күбэй ийэлэрбитигэр тыыннаах сибэкки дьөрбөтө Махтал бэлиэтинэн туттарылынна.
Үөрүүлээх чааска нэһилиэкпит элбэх оҕолоох, общественнай олоххо актыыбынай позициялаах ийэлэригэр олохтоох дьаһалта аатыттан махтал суруктар, бочуотунай грамоталар туттарылыннылар. Нэһилиэкпит убаастанар дьиэ кэргэнэ, 50 сыл бииргэ олорбут Розалия Тимофеевна, Иван Иванович Егоровтар Ил Дархан А.С. Николаев илии баттааһыннаах "Семейная доблесть " бэлиэнэн наҕараадаланнылар. СР Ийэ күнүнэн ыытыллыбыт "Мин үкчү ийэм" курдукпун хаартысканан күрэх кыайыылаахтара Сысолятиннар, Петровтар дьиэ кэргэттэрэ "Алгыс" НАК аатыттан бэлэх тутан үөрүүлэрэ үксээтэ.
Кэрэ киэһээни уһуйаан иитиллээччилэриттэн саҕалаан улаханна дьоҥҥо тиийэ нэһилиэкпит уус-уран самодеятельноһын кыттыылаахтара, ырыа- үҥкүү коллективтара бэлэх ууннулар. Чаҕылхай Махсыым дойдутуттан, Хатырык нэһилиэгиттэн ырыаны өрө туппут "Махсыым уолаттара" ансаамбыл көрөөччү биһирэбилин ыллылар. Бу киэһээ байыаннай операцияҕа сылдьар биир дойдулаахтарбытыгар көмө хомуйуу акцията үлэлээтэ. Кэнсиэр бириэмэтигэр уопсайа 24000 солк. киирдэ, ону тэҥэ «Иис Куо», «Сканди» ( сал. Барашкова А.К) түмсүүлэр кыттыһан оҥорбут анал набордара туттарылынна (толору эмтээх тигии аптечка).
Хаартыскалар: Сивцева С.К
Видео: Москвитина Е.П.
Комментариев нет:
Отправить комментарий