Олунньу 22 күнүгэр, "Эйгэ" модельнай библиотека сырдык саалыгар "Ытык иэс" кинигэ сүрэхтэниитэ ис сүрэхтэн тэрээһиннээхтик ааста. Кинигэҕэ нэһилиэкпититтэн төрүттээх, аармыйа кэккэтигэр сулууспалаан кэлбит эр дьон киирдилэр. Кинигэ автора РФ журналистарын, СР суруйааччыларын сойуустарын чилиэнэ Анатолий Михайлович Софронов- Онтуон.
Бу киэһээ ыҥырыылаах ыалдьыттар кинигэ тула санааларын үллэһиннилэр, махталларын биллэрдилэр. Истиҥ көрсүһүү киэһэтэ "Алгыс " НАК, " Эйгэ" библиотека коллективтара тэрийиилэринэн ырыа- тойук аргыстаах, аармыйа олоҕун санатар сэттэ түһүмэхтэн турар көрдөөх оонньуулаах түмүктэннэ.
Олунньу 23 күнүгэр "Алгыс" НАК орто оскуолабыт улахан кылааһын үөрэнээччилэрин " Уол оҕо- норуот кэскилэ» күрэххэ түмэ тарта. Манна уопсайа түөрт хамаанда биэс түһүмэххэ күөн көрүстэ. Түмүккэ кыайыылааҕынан таҕыста 9« а» кылаас, иккис миэстэ 11 кылаас, үһүс миэстэ 9 «б» кылаас хамаандалара. Автоматы түргэнник ыһыыга, хомуйууга анал аат туттарылынна 9 «а» кылаас үөрэнээччитигэр Георгий Соловьевка. Күрэх уһуллуута Ютуб каналга сотору кэминэн тахсыаҕа.
Бу курдук икки күн устата Аҕа дойдуну көмүскээччилэр күннэригэр анаммыт тэрээһиннэр бэрт сэргэхтик ыытылыннылар.
Комментариев нет:
Отправить комментарий