Мин , Березкина Татьяна Алексеевна 1955 сыллаахха Слепцовтар дьиэ кэргэннэригэр ахсыс оҕонон күн сирин көрбүтүм. Ийэм Бекренева Мария Николаевна , аҕам Слепцов Алексей Васильевич Орто Халыма оройуонун Налимск бөһүөлэгин төрүт олохтоохторо. Мин Налимск 8-с кылаастаах оскуолатыгар бастакы кылаастан ахсыс кылааска диэри үөрэммитим. Салҕыы Орто Халыма орто оскуолатыгар 10 кылааһы үөрэнэн бүтэрбитим. «Оскуола- производство- үрдүк үөрэх» бачыымы бүтүн кылааһынан өйөөн дойдубар Налимскайга 1973 сылтан 1976 сыллаахха диэри ыанньыксыттаабытым.
1976 сыл күһүнүгэр Дьокуускайдааҕы культпросвет училище хоровой отделениятыгар үөрэнэ киирбитим. Үҥкүү, драм, хоровой отделенияларыгар үөрэнэ сылдьар түөрт устудьуон кыргыттар бастакы курсу бүтэрээт бэс ыйыгар 1-Хомустаах кулуубугар практикалана кэлбиппит.Ол кэмҥэ кулууп сэбиэдиссэйинэн Новгородова Валентина Николаевна үлэлии сылдьара. Биир окладка кини хоровик, баянист, ыытааччы, сценарист, режиссер, үҥкүүһүт үлэтин барытын үлэлиирэ. Ыһыахха бэлэмнэнии күүрээннээх үлэтигэр түбэһэн үлэ бөҕөтүн көрсүбүппүт даҕаны, уопутурбуппут даҕаны. Бу кулуупка практикабын бара сылдьан 1-Хомустаах нэһилиэгин олохтоох уолун Березкин Николай Васильевыһы кытта билсиһэн 1977 сыллаахха ыал буолбуппут. Бу сыл идэбинэн үөрэхпэр 2-с куурустан кэтэхтэн үөрэнэргэ көспүтүм. 1978 сыллаахха бастакы оҕобут Сережа, 1982 сыллаахха иккис оҕобут Коля,1985 сыллаахха кыыспыт Лена күн сирин көрбүттэрэ. 1979 сыллаахха 1- Хомустаах дьааһыла -садыгар иһит сууйааччынан үлэлээбитим. Хоровик идэтин 1981 сыллаахха бүтэрбитим.1983 сылтан нянянан, 1990-2008 сс детсад завхоһунан үлэлээбитим. 2005 сылтан пенсионербын.
Тустаах үлэм таһынан олохсуйан олорор нэһилиэгим общественнай үлэтигэр активнайдык кыттарым. Ол курдук,1989 сылтан 2004 сылга диэри 1- Хомустаах нэһилиэгин дьахталларын сэбиэтин бэрэссэтээтэлинэн үлэлээбитим. Кулууптарга көмөлөһөн Советскай армия , Дьахтар күннэрин тэрийсэн ыытарбыт. Детсадка хабыллыбатах оҕолорго анаан Оҕо көмүскэлин күнүгэр бырааһынньык тэрийэн үөрдэрбит. Сыллата агитзоналар икки ардыларыгар ыытыллар «Мама, папа, я- спортивная семья» күрэх тыҥааһыннаахтык барара. Ол курдук, Хатырыкка ыытыллыбыт оройуон күрэҕэр Рейман, Мария Сивцевтар 2-с миэстэни, Андрей, Анастасия Ушницкайдар 3-с миэстэни ылбыттара. Иван, Людмила Егоровтар республикатааҕы күрэххэ кыттыбыттара. Андрей, Анастасия Ушницкайдар НВК тэрийэн ыыппыт «Сайдам ыал» күрэҕэр ситиһиилээхтик кыттыбыт тара.2002 сыллаахха «Тыа ыала» республикатааҕы тэрээһиҥҥэ Иван, Розалия Егоровтар кыттан үөрэн- көтөн кэлбиттэрэ. Ол кэмнэргэ кулууп директорынан Орлова Яна Петровна үлэлиирэ.Кини бу күрэххэ кыттааччы, тэрийсээччи дьоҥҥо саха таҥастарын тиксэн , барыбытын түмэн көрө-истэ диэн Дьокуускайга киилэртээбитэ.
Нэһилиэк дьахталларыгар күрэхтэри, араас тэрээһиннэри ыытыыга кулуупка араас кэмнэргэ үлэлээбит директордар, специалистар олус көмөлөспүттэрэ. Ол курдук : Новгородова Валентина Николаевна, Попова Матрена Кузьминична, Колесова Александра Ильинична, Олесова Александ ра Иннокентьевна,Соловьева Татьяна Родионовна, Орлова Яна Петровна , Обутова Любовь Пантелеймоновна, Матвеева Анна Тимофеевна, Максимова Елена Андриановна, Соловьева Анастасия Степановна, Окоемов Александр Николаевич, Бурнашев Александр Константинович көмөлөрө улахана. Обутова Любовь кэккэ сылларга женсовет чилиэнэ этэ, онон туох баар үлэҕэ бастакынан көмөҕө кэлэрэ. Нэһилиэккэ, оройуоҥҥа, республикаҕа үгүс элбэх фестиваллар , ырыа күрэхтэрэ буолаллара. Нэһилиэкпит күүстээх куоластаах кэрэ аҥардара: Константинова Светлана Георгиевна, Шарапова Мария Петровна, Тихонова Александра Максимовна, Пинигина Софья Петровна, Перевалова Надежда Петровна сольнай ырыалара, Казанова Надежда Петровна сахалыы ырыалара, тойуга, Новгородова Евдокия Андреевна частушкалара элбэх көрөөччү биһирэбилин ылаллара. Онтон мин концертарга үксүн ийэ туһунан ырыалары ыллыырбын сөбүлүүрүм. Байааҥҥа доҕуһуоллуура Азаров Николай Филиппович.
1985 сылтан 1993 сылга диэри Музыкальнай оскуола байааҥҥа учуутала Акимова Варвара Кирилловна байаанынан нэһилиэкпит үгүс элбэх концертарын доҕуһуоллуура. Кини кэнниттэн музыкальнай оскуолаҕа директорынан, оскуолаҕа пение учууталынан баянист Виктор Федорович Орлов үлэлээбитэ. Кини оскуола, детсад, араас тэрилтэлэр, кулууп бары тэрээһиннэригэр байааҥ ҥа оонньоон барыбытын да абыраабыта, сэргэхсиппитэ. Музыкальнай оскуола сольфеджиоҕа уонна хорга учуутала Ядрихинская Маргарита Максимовна үгүс сылларга оройуоҥҥа ыытыллар фестивалларга нэһилиэк хорун салайан , бэлэмнээн дьон – сэргэ сөпкө ыллыыр культуратын сайыннарбыта. Кини бэлэмнээбит хордара оройуон күрэхтэригэр хаста да кыайыылааҕынан тахсан хайгаммыттара.
Клара Прокопьевна Орлова наһаа да үчүгэйдик сыанкаҕа оонньуура, монолог ааҕара. «Ийэ эрэлэ» хоһоонун ааҕан элбэх көрөөччү сүрэҕин долгутара. Кини Соловьева Светлана Алексеевналыын араас сыаҥкаларга оонньоон күллэрэн аҕай биэрэллэрэ.1990 сыллаахха «Ситцевый бал» диэн биэчэри женсовет нэһилиэккэ ыытан кэрэ аҥардары олус үөрпүппүт. Хаһан да аккаастаабат үҥкүүһүт кыргыттарбыт Корякина Мария Афанасьевна , Дмитриева Галина Афанасьевна , Бело любская Любовь Семеновна, Дмитриева Елизавета Михайловна, Федорова Розалия Егоровна, Николаева Елизавета Иннокентьевна, Николаева Светлана Игнатьевна, Софронова Евдокия Дмитриевна уо.д.а. нэһилиэк культурнай олоҕун олус киэргэппиттэрэ. Бу сылларга женсовет уонна нэһилиэк кулууба ыкса сибээстээхтик үлэлээбиттэрэ. Оройуоҥҥа, республикаҕа ыытыллар араас тэрээһиннэргэ бириистээх миэстэлэргэ тиксэрбит.
«Нам» совхоз директора Дмитрий Федотович Алексеев 1989 сыллаахха 50 саастарын туолбут нэһилиэк үлэһит дьахталларыгар сибиинньэ оҕолорун бэлэхтээбитэ. Ону таһынан Дмитрий Федотович соҕотох ийэлэри, кыаммат ыаллары мууһунан, оттук маһынан уонна оҕуруот аһынан хааччыйара. Ийэлэри, эбээлэри чиэстиир дьоро күннэрбитигэр, Дьахтар күнүн көрсө «Шляпалар» күрэхтэригэр уо.д.а. араас тэрээһиннэр кыайыылаахтарыгар «Мария», «Аартык» маҕаһыыннары арыйан үлэлэтэ сылдьар олохтоох уолбут Шарапов Гаврил Гаврильевич куруутун бириистэри туруоран спонсардыыра, билигин да көмөлөһөр. Нэһилиэкпит сайдыытыгар улахан кылааттарын кииллэрбит, бу икки үтүө дьоҥҥо олус махтанабын.
Орлова Яна Петровна кулууп директорынан үлэлии сылдьан нэһилиэк иистэнньэҥ дьахталла рыгар куруһуок тэрийэн сахалыы халадаай былааччыйаны, сэкиэччиги, дьабака бэргэһэни, сахалыы сон арааһын тигэргэ үөрэппитэ. Бэйэтэ таҥаһы быһар, тигэр буолан үгүс элбэх киһиэхэ сахалыы таҥастарын тигэн биэрбитэ. Онон нэһилиэк дьоно-сэргэтэ күргүөмүнэн саха таҥаһын таҥнар баҕатын уһугуннарбыта. Миэхэ кини халадаай былааччыйабын уонна соммун, бэргэһэбин тигэн биэрбитэ. Онон Яна Петровнаҕа махталым улахан.
2000-2020 сылларга биһиги дьиэ кэргэн «Хатыҥчаана» диэн бааһынай хаһаайыстыба тэриммиппит. Нэһилиэккэ ыытыллар культурнай тэрээһиннэргэ хаһаайыстыбабыт аатыттан бириис олохтуурбут.Ол курдук, нэһилиэк ыһыаҕар ыытыллар дьахтар саха таҥаһын күрэҕэр кыттар дьоҥҥо бириис туруорааччыбыт. «Мичээр» ансамбль ыытар мероприятиятыгар уонна Хомустаахха ыытыллыбыт республикатааҕы «Полярная звезда» үҥкүү күрэҕэр «Саамай кыра кыттааччы» номинация кыайыылааҕар приз туруорарбыт. Кэнники ыытыллыбыт «Полярная звезда» үҥкүү күрэҕэр «Саамай эдэр специалист» номинация кыайыылааҕар харчынан премияны туттарбыппыт.
Николай Федотов тылларыгар, Василий Алексеевич Зырянов мелодиятыгар айыллыбыт “ Хомустаах гиимнэ” ырыаны 2002 сыллаахха Обутова Л.П., Адьютантова ЛС, Орлова С.П., Ощепков И.А., Оконешников И.А уонна мин Аппааныга үлэлии турар “Хатынчаан студияҕа баран аан бастаан ыллаабыппыт олус эппиэтинэстээх, долгутуулаах , үөрүүлээх түгэн этэ. Биһиги ыллаабыт бу гимн ырыабыт билигин да торжественнай тугэннэргэ дьиэрэйэриттэн олус үөрэбин.
2018 сылтан мин нэһилиэкпит инбэлииттэрин «Үргэл» түмсүүтун салайааччытынан үлэлии сылдьабын. Ити сыл сэтинньи ыйыгар нэһилиэкпит инвалидтарыгар анаан “Төгүрүк остуол” тэрээ һини тэрийбитим. Онно улуус пенсионнай, социальнай, налоговай тэрилтэлэрин салайааччыла рын, кылаабынай бырааһы ыҥыран кытыннарбытым. Ыҥырыллан кэлбит салайааччылар инбэ лииттэргэ туох көмө көрүллүбүтүн, уларыйыылар баалларын кэпсээбиттэрэ. Кулууп үлэһиттэрэ Орлова Сардаана, Барашкова Анастасия оонньуу ыытан, ыллаан – туойан бу тэрээһини киэргэп питтэрэ. 2019 сыллаахха нэһилиэк олоҕун тупсарыыга анаммыт “Майское созвездие” күрэх кулууппутугар ыытыллыбыта, онно мин нэһилиэк балаҕанын ис- тас көстүүтүн тупсарыыга проегым “Лучший проект” номинацияҕа тиксибитэ.
Нэһилиэкпит библиотеката (сал.Жиркова Н.Д.) уонна биһиги түмсүүбүт ыкса үлэлэһэр. Ол курдук, 2020 сыллаахха ыытыллыбыт “Угадай мелодию” күрэххэ биһиги түмсүүбүт чилиэнэ Ядрихинская Маргарита Максимовна 1 миэстэни ылбыта. Нам улууһун киин библиотеката тэрийбит Брейн- ринг күрэҕэр биһиги хамаандабыт 2 миэстэни ылбыта. Олохтоох библиотека үлэһиттэрэ Жиркова Н.Д., Сивцева Л.П. тэрийбит “Ийэ мичээрэ” онлайн- курэххэ ийэлэр кыргыттарынаан ситиһиилээхтик кыттыбыттара: Шарапова Мария Петровна., Степанова Анна Владимировна., Ядрихинская Маргарита Максимовна , Прокопьева Ольга Николаевна . 2021сыл лаахха инвалид оҕолорго анаан ыытыллыбыт Онлайн- уруһуй күрэҕэр Никифоров Виктор 1 миэстэни ылбыта. Хатырык библиотеката улууска тэрийэн ыыппыт Онлайн - викторинатыгар биһигиттэн Прокопьева Галина Николаевна кыттан 3миэстэни ылбыта.
2021 сыл ахсынньы ыйгар ыытыллыбыт “ Счастливы вместе” инвалидтар республикатааҕы онлайн- күрэхтэригэр биһиги түмсүүбүт чилиэннэрэ Людмила, Семен Парниковтар Нам оройуонун аатыттан ситиһиилээхтик кыттан республикаҕа бастаабыттара уонна сыаналаах бириистэринэн наҕараадаламмыттара. Бу үөрүүлээх тэрээһинҥҥэ көмөлөспүт « Алгыс» норуот айымньытын киинин кулууп директорыгар Новгородова А.Н., специалистарыгар Орлова Сардаана Петровнаҕа, Рожина Евгения Васильевнаҕа, «Мичээр» оҕо үҥкүү ансамблын салайааччытыгар ФилипповаТатьяна Филипповнаҕа уо.д.а үлэһиттэргэ махтанабыт.
“ Алгыс» норуот айымньытын киинин коллектива, нэһилиэк дьонун өйүн- санаатын аны да түмэ туруҥ, кэрэҕэ угуйуҥ. Общественнай тэрилтэлэри кытта ыкса үлэлэһэн үрдэлтэн үрдэллэри ылан иһин. Алгыстаах айымньылаах үлэҕит аартыга арылла турдун !
«Үргэл» инбэлииттэр түмсүүлэрин салайааччыта Березкина Татьяна Алексеевна.
Комментариев нет:
Отправить комментарий