Тыа сирин кулууба үлэтин саҕалаабыта 70 сылынан

Аҕабыт   уһун сыралаах, бэриниилээх үлэтэ үтүө холобур буолар

      Охлопков Петр Прокопьевич  1934 сыллаахха кулун тутар 1күнүгэр Үөдэй нэһилиэгэр элбэх оҕолоох ыалга 2 -с оҕонон күн сирин көрбүтэ. Кыра эрдэҕиттэн сытыы-хотуу, билиигэ тардыһыылаах этэ. Ааҕар-  суоттуур предметтэргэ дьоҕурдааҕын  көрдөрбүтэ. Оскуола кэнниттэн , Дьокуускай куоракка киирэн , киномеханиктар курстарыгар уөрэнэн , “ киномеханик 2 категории звукового кино ” диэн идэни ылбыта. 1953 с. от ыйын 10 күнүттэн 1- Хомустаахха киномеханик үлэтин саҕалаабыта. Бүлүү куоратыгар 1956 с. 1сыл баран үлэлии сылдьыбыта. Онтон кэлэн ,  1957-1979 сылларга диэри  1- Хомустаахха киномеханигынан  үлэлээбитэ.

     1950- 60 сылларга туох да техника суох эрдэҕинэ, атынан аппараатын тиэнэн хас да хонукка Таастааҕынан , «Кэҥкэмэ» колхоһунан , Салбанынан барара. Хастыы да киинэни илдьэрэ. «Дьон киинэ көрөр баҕаларын толорон, сорох киэһэ 2-лии киинэни көрдөрөөччүбүн . Көрөөччүлэрим утуйа- утуйа көрө олорор буолааччылар, » - диэн кэпсиирэ. Киинэ буола турар кэмигэр киноплен ка быстан хаалааччы, ону тургэн  үлүгэрдик холбуу охсон, салгыы көрдөрөрө. Киинэ буолар күнүгэр , күнүс эрдэ, кыһыл суругунан суруллубут биллэриини дьон үөрэ- көтө күүтэрэ, көрөрө. Суругар сүрдээх болҕомтолоох этэ. Былаанын куруук толорор буолан, таһаарыылаах үчүгэй үлэтин  иһин «Урал» мотоцикл фондатынан наҕараадаламмыта. Мотоциклыгар  киинэлэрин тиэнэн, чугас дэриэбинэлэринэн , сайын сайылыктарынан , отчуттар биригээдэлэринэн куруутун сылдьара.   «Урал» мотоцикл тыаһын  иһиттэхпитинэ үөрэбит, биһиэхэ күүтүүлээх киһи буолара”, - диэн дьон ахтара. Кэнники доруобуйатынан  2 группалаах инвалид буолан баран, «Нам» совхозка, орто оскуолаҕа үлэлээбитэ. Уһун сыралаах , бэриниилээх үлэтин элбэх Бочуотунай грамоталар , Махтал суруктар туоһулууллар. Үлэтин таһынан , үлүһүйэн туран, нуучча дуобатынан дьарыктанара. Нам оройуонун уонна республика хас да төгүллээх чемпиона, призера, ССРС спордун маастарыгар кандидат  этэ.

                                                

Ахтыыны суруйда кыыһа Охлопкова  Марианна Петровна.                                                           

Мунньах кэмигэр

Эргэ кулуупка Саҥа дьыл бырааһынньыга.
Тымныы  Оҕонньор (П.Охлопков)
бэлэх туттарар.

     .