Ахтан, санаан аастахха......
Биһиги Партизантан Хомустаахха 1973 сыллаахха көһөн кэлбиппит.Ол саҕана кулуупка директорынан Константинов Константин Николаевич , худругунан Попова Мотрена Кузьминична ,Тихонова Валентина Николаевна үлэлииллэрэ, пьеса бөҕөтүн туруораллара , мин «Хачыгыр» пьеса5а кыттан фестивальга Аппааныга баран көрдөрөн биһирэбил ылбыппыт.Кулуубка куораттан элбэх кэнсиэр кэлэрэ, ол курдук: Юрий Платонов,Владимир Заболоцскай,Светлана Кудрина, «Чолбон» ВИА ансаамбыла ,Өлүөхүмэттэн лилипуд игирэ Кельбиновалар. “Юрий Платонов лакированнай түүпүлэлээх сыана ортотугар биирдэ баар буола түһэрэ ,иннигэр олорор кырдьаҕастар өмүрэн саала иһэ күлсүү бөҕө буолара”-дьэ ити курдук бэрт үчүгэйдик кэнсиэртээн бараллара. Ол са5ана таансыбыт баянын буолара Атласов Павел Иванович,Николай Филиппович Азаров , Семен Семенович Тихонов ,Винокуров Бааска баяҥҥа оонньууллара. Мин дьүөгэм Корякина Варвара Ивановна киномеханик ,дьэ Намтан автобуһунан баанкаларын таһан , онтон кулуубугар диэри салаасканан соһон илдьэрэ, биллэриитин бэйэтэ суруйара,билиэтин эмиэ бэйэтэ атылыыра ,өрүүтүн кулууп иһэ тобус толору киһи буолара , ытаһа – ытаһа индиийскэй киинэ бөҕө көрөн кэллэхпит. Саҥа дьыл, Эргэ саҥа дьыл,Дьахтар күнэ Акимова Зоя Васильевна уонна Наталья Гаврильевна Петровалыын кулууп үлэһиттэригэр көмөлөһөн бэрт сэргэхтик,бэһиэлэйдик ыыталлара.Данилов Василий Трифонович нэһилиэккэ аҕыс Агитзона тэрийбитэ, мин «Чолбон» агитзона салайааччытынан улэлээбитим, кулуупка агитзоналарынан дуобакка, шахматка, теннискэ күрэхтэһэллэрэ , саас хайыһарынан БГТО-ГТО нуормаларын туттарарбыт. Нэһилиэккэ Женсовет чилиэнинэн сылдьыбытым «Хозяюшка» кружок тэрийэн ас арааһын астыырбыт, Олесова Татьяна Ивановна ,Ядреева Марианна Ивановна ,Данилова Мария Ивановна, Ядреева Марианна Ивановна буоламмыт ас астаан совхоз остолобуойугар Дьахтар кунугэр ,Кыайыы күнүгэр сэрии ветераннарын ,кырдьаҕастары мунньан чэйдэтэрбит.Неустроева Елена Ивановна ,Тихонова Валентина Николаевна эдэр ийэлэри ,ким баҕалааҕы кулуупка мунньаннар баайарга ,иистэнэргэ ,тигэргэ үөрэтэллэрэ.Кулууп үлэһиттэрэ араас хабааннаах мероприятиялары ыыталлара ,ырыа –үҥкуу , сценкалар, испиктээкиллэр, фестиваллар тэрилтэлэринэн буолаллара. «Мичээр» ансаамбыл салайааччытынан Окоемов Александр Николаевич өр кэмҥэ салайан ,оҕо бөҕөтүн үҥкүү кэрэ эйгэтигэр үөрэттэ.”Мичээрдэр” бастакы кэнсиэртэрин көрдөрөллөрүгэр эргэ кулуупка саалаҕа көрөөччүлэр баппаккалар киирэр ааҥҥа олоппос үрдүгэр,оннооҕор остуол үрдүгэр тахсан туран кэнсиэри көрбүттэрэ, дьэ онтон кынаттананнар араас улуустарынан сылдьан гастроллаабыттара.
Нэһилиэкпитигэр икки этээстээх таас кулууп тутуллан 1989 сыллаахха үлэҕэ киирбитэ директорынан Колесова Александра Ильична үлэлээбитэ, кэлиҥҥи өттүгэр Олесова Александра Иннокентьевна ,Соловьева Татьяна Родионовна ,Орлова Яна Петровна директорынан үлэлээбиттэрэ. «Проводы зимы» гараж анныгар тэрийэллэрэ , түөлбэлэринэн концерт, частушка, остуол тардан самовар өрөн күрэхтэһэрбит ,представления көрдөрөр этибит ,хаар оҥоһукка, ходулянан хаамыыга , хаҥкыга күрэхтэри тэрийэллэрэ. Лена Максимова драм кружогу салайан үлэлэтэрэ, испиктээкил бөҕөтүгэр кыттарбыт , ол курдук Леонид Попов «Улуу Туймаада» драманан испиктээкил туруорбута Намҥа фестивальга Гран-при буолан турардаахпыт.Кулууп үлэһиттэрэ күрэх бөҕө ыыталлара, “А ну-ка Мамы ”, “Эбээлэр”, “Кийиит -Хотун” “Эбээ уонна сиэн”, бу курэхтэри көрө дьон тоҕуоруһа кулуупка мусталлара,өрүүтүн саала иһэ көрөөччүнэн толору буолара. Билигин Александра Николаевна Новгородова салайааччылаах кулууп үлэһиттэрэ олус үчүгэйдик,таһаарыылаахтык үлэлии сылдьаллар ,бары талбыт курдук үлэлэригэр ис сүрэхтэриттэн кыһаллаллар, нэһилиэк бары тэрилтэлэрин хабан , общественнай түмсүүлэри, эдэрдиин кырдьаҕастыын бары кулууп тэрээһинигэр кыттабыт. Үлэҕитигэр үрдүк ситиһиилэри,чэбдик доруобуйаны , тус олоххутугар дьолу баҕарабын.
Сцена ветерана Жиркова Варвара Дмитриевна
Комментариев нет:
Отправить комментарий