Николай Филиппович Азаров сырдык аата ааттана турдун!
Биир үтүө күн үөрэнээччибин Аня Мылаханованы көрсөн кэпсэттибит. Анна нэһилиэкпитигэр «Тыа сирин кулууба үлэтин са5алаабыта 70 сыла» туоларынан, онно үлэлээбит, нэһилиэк культурнай оло5ор актыыбынай кыттыыны ылбыт дьон туһунан ахтыы хомуйа сылдьалларын кэпсээтэ. Миигиттэн ахтыы суруйуон дуо диэн көрдөһүүлээх буолла.
Онно туран харахпар нууччалыы сэбэрэлээх, куудара баттахтаах Коля Азаров көстөн кэллэ. Кинини о5о эрдэхпиттэн билэрим. Балта Маша о5о сааһым дьүөгэтэ. Коля мин убайбынаан до5ордуулар. Машалыын уһун күнү быһа бииргэ оонньоон улааттахпыт. Онон бу ыалтан арахпаппын.
Биһиги кыра кылааска үөрэнэрбитигэр Коля Төӊүлү оскуолатын бүтэрэн ЯПУ-1 физкультурнай салаатыгар үөрэнэрэ. Ѳрөбүлүгэр дьиэтигэр тахсара, аһаат Винокуров Бааскалаахха эбэтэр кулуупка ыстанара. Бааска айыл5аттан бэриллибит талааннаа5а. Баянна бэркэ оонньуура. Киниттэн балтылара Лена, Коля баянӊа оонньуурга үөрэммиттэрэ.
50-с, 60 –с сылларга биһиги кыраларбыт, алын , орто сүһүөх кылаас о5олоробут. Ол да буоллар, тэӊ сааастыылаах о5олор суохтарыттан эбитэ дуу, нэһилиэк ыччаттарын кытта тэнӊэ киинэ5э, кэнсиэргэ, танцыга сылдьарбыт. Ким да буойбат. Онон оччотоо5у ыччат хайдах сынньанарын көрөн улааттахпыт… Онтон улаатан, үөрэнэн, араас сирдэринэн үлэлээн- хамсаан, тэлэһийэн дойдубун 1973-74 с.с. булбутум.
Коля Азаров, Николай Филиппович диэн буолбут. Оскуола5а физкультура, ырыа учууталынан үлэлиир эбит. Оччоттон баччаанаа дылы баянын кото5о сылдьар. Биллэр баянист буолбут. Кинитэ суох биир да тэрээһин барбат. Күнү быһа оскуола үлэтиттэн, уруоктар, күрэхтэһиилэр кэннилэриттэн аны киэһэ кулуупка тахсан хор, ырыа, үӊкүү бэлэмниир. Биир киһиэхэ сүрдээх но5урууска диэбэккит дуо!? Ону биир да салайааччы аһыммыт, хай5аабыт быһыыта көстүбэт. Николай Филиппович бэйэтэ да : «Айа- дьоко, сылайдым- элэйдим», - диэн кимиэхэ да үӊсэргээбэт. Арай кэргэнигэр, Шура5а, Александра Николаевна5а этинэрэ дуу? Суох буолуо ээ. Дьэ холку майгылаах киһи этэ. Биирдэ кыыһыран турарын көрбөтө5үм. Николай Филиппович, Валерий Романович буолан оскуола5а үһүөн элбэх тэрээһини ыыппыт буолуохтаахпыт. Онно Николай Филиппович баянын илиитигэр ыллар эрэ ханнык ба5арар тэрээһин кыаллара, табыллара. Онтон бэйэбит сүргэбит көтө5үллэрэ.
60-с, 70-с сылларга нэһилиэккэ баянист кини эрэ этэ. Ырыаны истиэ эрэ кэрэх таһаарара. Кини баянын тыаһыгар до5уһуоллатан үчүгэйдик да ыллыыр ыччаттар бааллара: Константин, Светлана Константиновтар, Надежда Перевалова, Ефросинья Федорова, Анна , Мария Охлопковалар уо.д.а. Ол са5ана үӊкүү эмиэ баянынан до5уһуолланара. Уолаттар, кыгыттар бөлө5үнэн сүрдээх көхтөөх үӊкүүлэри толороллоро. Күнүскү ыарахан үлэттэн сылайбыттарын үӊкүүлээн таһаараллара.
1989 сыллаахха саӊа, улахан кулууп тутуллан үлэ5э киирбитэ. Киинэ, кэнсиэр буоллар эрэ кулууп иһэ тобус толору буолара. Кулууппут улахана, үрдүгэ, сырдыга киһини эрэ сырдыкка, кэрэ5э угуйар курдуга.
Субуота киэһэлэргэ ити үлүгэрдээх киэӊ көрүдүөр бөһүөлэк ыччатынан туолара. Үөрүү- көтүү, дьон мичилиспит хара5а! Танцы! Танцы! Танцы! Маннык киэҺэлэртэн тирэх ылан, ыал буолбут ыччат элбээбитэ. Ол сыбаайбаларын үөрөүтэ- көтүүтэ, ырыата –тойуга Николай Филиппович баянын до5уҺуолунан ааста5а.
Кини үлэлиир кэмнэригэр нэҺилиэк, оскуола спортивнай, художественнай, агитационнай маассабай үлэлэрэ Николай Филиппович аатын кытта быҺаччы сибээстээхтэрэ. Кинитэ суох ити үлэ барыта туруох курдук мин сыаналыыбын. Сүрдээх үчүгэй, дьоҺун киҺи биҺиги ортобутугар олорон ааспыта, Николай Филиппович Азаров сырдык аата ааттана турдун !
Мария Романовна Колмогорова,
С Р Үөрэ5ириитин туйгуна, Учууталлар Учууталлара, СР уопсай Үөрэхтээһинин ситимин бочуоттаах ветерана.
Комментариев нет:
Отправить комментарий