Ийэбит үлэлээбит үтүө кэмнэрэ
Биһиги күн күбэй ийэбит, эбээбит педагогическай үлэ ветерана, үрдүк категориялаах социальнай педагог Колесова Александра Ильинична 1983 сылтан I Хомустаахтааҕы культура дьиэтин директорынан тэрээһиннээхтик, айымньылаахтык, ис дууһатыттан үлэлээбитэ. Дьон-сэргэ иллэҥ, сынньалаҥ кэмнэрин көдьүүстээхтик атааралларыгар араас тематическай дакылааттары, лекциялары, бэсиэдэлэри, куонкурустары, биэчэрдэри, концертары, быыстапкалары, кулууптары, куруһуоктары, спортивнай күрэхтэри, ырыаны-тойугу, үҥкүүнү интириэһинэйдик тэрийэн ыыталлар этэ.
Билигин да дьон-сэргэ кини үлэлээбит кэмнэрин наһаа истиҥник ахталлар, саныыллар. Ол курдук, саас аайы аллараа күөлгэ кыһыны атаарыы, аан дойду дьахталларын күнүгэр “А ну-ка девушки” күрэхтэһиилэр, “От всей души” биэчэрдэрэ, “Хаһаайка” кулуубка араас омуктар амтаннаах астарын бэлэмнииллэрэ, таҥас-сап баайаллара, тигэллэрэ, “Эдэр ыал” кулуубка эдэр дьону дьоллоох ыал буолууга үөрэтэллэрэ. Кырдьаҕас Герой ийэлэри кытта көрсүһүүлэри, кинилэр алгыстарын тиэрдэллэрэ, “Эдэр ыаллар” конкурстарын ыытыылары кэрэхсэбиллээхтик тэрийэрэ. Армияҕа ыҥырыллыы, армияттан төннуу бырааһынньыктары үрдүк тэрээһиннээхтик ыыталлара. “Фантазия” диэн ааттаах ыччакка аналлаах кафе арыйан үлэлэппиттэрэ. Оҕолор уонна улахан дьон үҥкүүлэрин куруһуогун тэрийбиттэрэ. Үҥкүүлэри Александр Николаевич Окоемов туруорар, оркестры Константин Константинович Бурнашев салайар этэ. Оскуола оҕолоругар анал музыкальнай үөрэхтээх Степан Николаевич Андреев инструментальнай ансаамбылы үлэлэппитэ. Норуот прикладной искусствотын сайыннарыыга туоска норуот маастара Марфа Иннокентьевна Новгородова, маска Федор Николаевич Сысолятин, Филипп Иванович Николаев, сабынан баайыыга Мария Егоровна Прибылых, Людмила Ивановна Николаева, иистэниигэ Анна Федотовна Харитонова эдэр ыччаты үөрэтэллэрэ. Агитационнай-культурнай биригээдэ тэрийэннэр сайын аайы совхоз быйаҥнаах сайылыктарынан, фермаларынан, отууларынан, ходуһаларынан, бааһыналарынан, биригээдэлэринэн, звеноларынан сылдьаннар үлэһиттэргэ анаан концертыыллара,гастроллууллара. Республикаҕа биллэр ырыаһыттары, Саха государственнай театры кытта ыкса үлэлиирэ, кини ыҥырыыларын ылынаннар концерт, спектакль көрдөрө гастроллуу кэлэллэрэ. Элбэх да артыыстар, ырыаһыттар биһиги дьиэбитигэр хонон-өрөөн, ыалдьыттаан ааспыттара. Ол курдук, Саха Республикатын Үтүөлээх ырыаһыттара Анастасия Варламова, Раиса Захарова, Аркадий Алексеев, Екатерина уонна Алексей Егоровтар, баянист Владимир Индигирскай, театр артыыстара олоҥхоһут Гаврил Колесов, Изабелла уонна Анатолий Николаевтар, Петр Пестряков уо.д.а.
Кини үлэтин сыратынан 1986 сыллаахха саҥа микроавтобус ылбыттара, 1989 сыллаахха республиканскай көрүү күрэгэр кыттан “Туйгун үлэлээх кулууп” аатын иккистээн сүкпүттэрэ. 1989 сыллаахха 300 миэстэлээх улууска бастакы саҥа таас кулууп үлэҕэ киирбитэ, кулууп тутулларыгар нэһилиэк дьонун түмэн субуотунньук бөҕө тэрийэн, сүүрэн-көтөн үлэҕэ киллэттэрбитэ.
Маны таһынан биһиги ийэбит нэһилиэк, улуус общественнай олоҕор көхтөөхтүк кыттара, нэһилиэк сайдарын туһугар олус кыһаллан үлэлээбитэ-хамсаабыта, сүүрбүтэ-көппүтэ,бэйэтин тус кылаатын киллэрбитэ, олоххо активнай позициялааҕа. Дьоҥҥо-сэргэҕэ холобур буолан барытыгар инники күөҥҥэ сылдьара. Элбэх эдэр ыччакка сүбэтинэн-аматынан күүс-көмө буолбута. Саҥа ыал буолааччыларга сыбаайба, өрөгөйдөөх юбилей бөҕөтүн ыыппыта. Кини үтүө суобастаах, олус эппиэтинэстээх, дьаһаллаах, ирдэбиллээх салайаачы этэ, хаһан баҕар бэйэтин көрүүлэрин аһаҕастык этэрэ. Ийэбит күүстээх санаата, инникигэ дьулуура, олоххо таптала биһиэхэ холобур буолар. Кини үтүө аата, үлэлээбит кэмнэрэ үйэ-саас тухары умнуллубатын, өрүү ахта-саныы, өйбүтүгэр- санаабытыгар истиҥник илдьэ сылдьыахпыт.
Кыыһа Тойтонова Софья Иннокентьевна СР тыатын хаһаайыстыбатын туйгуна, СР агропромышленнай холбоһук бочуоттаах үлэһитэ.
Комментариев нет:
Отправить комментарий