Үлэҕэ бэриниилээх үтүө дьон...
Мин 1970 сыллаахха онуһу бүтэрэн баран икки сыл ньирэй көрөөччүнэн үлэлээбитим ,онно үлэлии сылдьан нэһилиэк иһинэн тэриллэр художественнай самодеятельноска ахтыыбынайдык кыттар этим.
Ол саҕана кулуупка директорынан Попова Матрена Кузьминична, худрук Новгородова Валентина Николаевна , баянист Азаров Николай Филиппович сүрдээх бэриниилээх дьон үлэлииллэрэ.Эдэр ыччаттар олус көхтөөх этибит ,күүстээх үлэ кэнниттэн кулуупка мустаммыт араас мероприятияларга кыттарбыт , репетиция бөҕө буолара . Киинэ кэниттэн репетиция диэтилэр да хаалан хойукка дылы сылдьаҕын.Коллективтарынан концерт бөҕө буолар , онно барытыгар сүүрэ сылдьаҥҥын ырыа буоллун,үҥкүү буоллун кыттан репетициялыыгын. Валентина Николаевна хорга, Матрена Кузьминична сценкаҕа бэлэмнииллэрэ, Николай Филиппович барытыгар баянынан доҕуһуоллуура. Оччолорго хореограф диэн суоҕа, Валентина Николаевна көмөтүнэн бэйэбит үҥкүү движениятын айа –айа үҥкүүлүүр этибит.Кэлин кийиит буолан кэлбит кийиит кыргыттар Галина Баишева, Мария Корякина сүрдээх үҥкүүгэ талааннаах буоланнар араас омук үҥкүүтүн үөрэппиттэрэ. Ол курдук Молдавскай , Украинскай, Венгерскай , билигин санаатахха син мээнэ үҥкүүлүүр эбиппит .Биир сыл Бальнай үҥүү кэмэ кэлэ сылдьыбыттааҕа , онно Валентина Николаевна миигин олох күүһүнэн куоракка үҥкүү курсугар ыыппыта, тиийбитим олох да бары кульпросветы бүтэрбит хореограф оҕолор кэлбиттэр, Намтан аҕыйах этибит , биһиги тыа оҕолоро, ол да буоллар тэбис –тэҥҥэ дьарыктанан курспутун на «Отлично» туттарбыппыт. Үөрэнэн бүтэн кэлэммин “Сударышка”, “Фигурный Вальс” о5олорго үөрэтэммин Намҥа буолбут бальнай үҥкүү күрэҕэр Лауреат урдүк аатын ылбыппыт. Үҥкүүгэ саамай активнайдык Окоемов А.Н., Атласов Р.Н., Аргунов А.Г., уо.д.а. , кыргыттартан Федорова Люба, Николаева Света, Федорова Роза, Колесова Маша, Баишева Галя, Корякина Мария сылдьаллара. Гастролларга сылдьар этибит Уус-Алдан улууһун барытын кэрийбиппит, ол сылдьан көрүдьүөс бөҕө буолара , биир оннук түгэни олох умнубаппын , Баатаҕай нэһилиэгэр кэнсиэртии сылдьыыбыт этэ , Валентина Николаевна нүөмэрбитин биллэрэ таҕыста : “ кыргыттар ансаамбылларын толоруутугар диэри , «Кыталыктар » толорууларыгар диэн кээстэ “ ыллыы тахсыбыппытыгар сыана анныгар олорор о5олор : “ Пахай эмээхситтэр та5ыстылар “ –диэн төлбү күллэрбиттэрэ.Онно биһигини кытта саастаах активнай баҕайы Тетя Мотя, Винокурова Хобороос наар ансамбылга ыллаһаллар этэ. Сценкаҕа саамай үчүгэйдик Мария Павловна, Людмила Ивановна Николаевалар оонньууллара , гастролга баран иһэн толкуйдууллар, массыына иһигэр репетициялыыллар уонна сүрдээх үчүгэйдик оруолларын толорор буолаллара.Валентина Николаевна наһаа дьоҕурдаах , ырыалары 1-2 –куоласка арааран үөрэтэрэ,баянын туппутунан сылдьара. Мотрена Кузьминична дьону кытта сүрдээх элэккэйдик сыһыаннаһара , тылыгар киллэримтиэ этэ, кини эттэ да барытыгар кыттыбытын , сөбүлэспитин эрэ баар буолара.
Николай Филиппович Азаровы саамай сөбүлүүр учууталбынан ,туохха да тэҥнэммэт дэгиттэр музыкант быһыытынан билинэбин . Биһиги кинини убаастаан наар Филиппович эрэ диэн ыҥырар этибит . Николай Филиппович анал музыкальнай үөрэҕэ суоҕа, кини слух көмөтүнэн оонньуур этэ уонна нотаны бэйэтэ заочно үөрэтэрэ, хаста даҕаны көрбүтүм нота тутан олорон бэлэмнэнэ олорорун .
Нэһилиэккэ коллективынан фестивальарга баянын кыбынан ,күлэн мичийэн киирэрэ бу баар курдук. Валентина Николаевна баяҥҥа эмиэ оонньуур , Филиппович хас коллективы кэрийэн кэлиэр дылы ,бэйэтэ баянынан репетицияны ыыта турара. Ыччаттар көхтөөх даҕаны этибит ,гастролга атын улууһунан эмиэ сылдьарбыт. Филиппович ырыаҕа оонньуу тахсыан иннинэ : “Тонҥун ми-ми, до-до”,- диэн этэн биэрэр, ону ыллыы тахсан иһэн этэн биэрэ5ин, оччо5о дьэ баянын то5о тардан кэбиһэр.
Кини хаһан да кыыһырбат , сылайбытын да биллэрбэт куруук мичийэ –үөрэ сылдьар , наһаа күлүүк этэ ол сылаабайын билэн биһиги наар дьээбэлээн тахсарбыт , оччоҕо олох ынырыктык күлэр этэ. Былыргы үҥкүүлэри наһаа үчүгэйдик оонньуура,холобур Полька, Краковяк уо.д.а. Төһөлөөх бырааһынньык кини баянын тыаһынан ааспыта буолуой. Билигин киниэхэ тэҥнээх баянис да суох, аны сайын буолла да сайылыктарынан ,ходуһаларынан агитбригадаҕа барара.Киниэхэ элбэх мелодистар сылдьаллара, Денис Данилов, Валерий Ноев, Семен Попов уо.д.а.Николай Филипповиһы биһиги көлүөнэ хаһан да умнубаппыт наар ахта саныы сылдьабыт .Дьэ ,бу курдук мин маннык үлэлэригэр бэриниилээх дьону кытта алтыспыт дьоллоохпун , олус үчүгэйдик саныыбын, кинилэргэ махталым улахан .
Ахтыыны суруйда сыана бэтэрээнэ: Е.М. Дмитриева.
Эдьий Лиза, махтал! Наhаа бэртээхэй ахтыы...
ОтветитьУдалить