Дьоҥҥо –сэргэҕэ үтүө санааны иҥэриҥ , чөл олоҕу тутуһуҥ!
Мин 1 Хомустаахха 1965 сыллаахха ыал буолан кэлбитим , ол сыл начаалынай оскуола5а 2 кылаас учууталын солбуйан үлэлээбитим. Кэлиэхпиттэн художественнай самодеятельноска кыттан барбытым. Кэргэним Константин Николаевич клуб сэбиэдиссэйэ буолан иккиэн бииргэ сылдьарбыт,ол саҕана туспа үҥкүү ансаамбыла диэн суоҕа онон бары ырыаҕа да үҥкүүгэ да тэҥҥэ сылдьарбыт. Биир киһи ырыаһыт да,үҥкүүһүт да буолар этэ. Аҥардас соло эрэ толорбоккун триоҕа, квартекка , ансамбылга тэҥҥэ кыттаҕын ,ол быыһыгар үҥкүүгэ эмиэ киирэҕин.Син аттаран барытыгар кыттар этибит.Билиҥҥи курдук фонограмма кэлиэ дуо, биир баяниһы өрө тута сылдьаҕын. Ол саҕаттан баяниһынан Азаров Николай Филиппович үлэлиирэ. Баянистка сүрдээҕин сылаалаах үлэ этэ, уһун кэнсиэри быһа баянын тута сылдьара ,арай сценка , хоһоон быыһыгар сынньанан ылара, хас кэнсиэр , торжественнай мероприятия, танцы аайы соҕотоҕун сылдьара. Нэһилиэк иһинэн тэриллэр бары бырааһынньыктарга Саҥа дьыл, Өктөөп ,Кыайыы үнэ, Ыһыах кэнсиэртэрэ Николай Филиппович баянын доҕуһуолунан барыта ыытыллара.Саҥа дьыл кэниттэн тэрилтэлэринэн фестивальнай кэнсиэрдэр саас хойукка дылы буолаллара, тэрилтэлэр тус-туһунан былаан быһыытынан кэнсиэр көрдөрөллөрө. Репетиция киэһээ аайы үлэ кэнниттэн буолара онно Николай Филиппович үөрэн –көтөн репетицияны сүрдээх үчүгэйдик ыытыр буолара. Хайдах тулуйа сылдьарын сатаан санаабаппын, хаһан да аккаастанарын бу диэн өйдөөбөппүн, аны генеральнай репетиция диэн чугас нэһилиэктэргэ кэнсиэрдээн кэлэрбит.Тэрилтэ кэнсиэртэрэ бүттэҕинэ оройуоннай фестиваллар буолаллара , онно дьэ өссө кытаанах бэлэмнэнии , таҥас тиктээһинэ, оформления оҥоруута. Оформленияны Константин Николаевичтыын үксүн бииргэ көмөлөөн иккиэн оҥорор этибит. Эпидиаскобунан тыктаран сыана истиэнэтин саҥа задник уруһуйдуур буоларбыт. Фестивальга хас да массыынанан Намҥа баран кыттарбыт. Биирдэ 100 киһилээх Хорунан кыттыбыппыт ,ол са5ана Хомустах, Үөдэй , Бартыһаан бииргэ «Нам» совхоз чиэһин көмүскүүрбүт, хаста да бириистээх миэстэҕэ тиксибит кэмнэрдээх этибит. Сайынын сайылыктарга ,отчуттарга , дояркалар ыһыахтарыгар , агитбригаданан сылдьарбыт , онно эмиэ Николай Филиппович баянын доҕуһуола суох сатаммат буоллахпыт. Биһиги саҕанааҕы нэһилиэк эдэр ыччата тус үлэлэрин , дьиэлэрин , оҕолорун көрөн истэн , нэһилиэк общественнай үлэтигэр активнай кыттыыны ылан, нэһилиэкпит дьонугар үтүө өйдөбүлү хааллардахпыт, сааһыран баран саныырга кэрэ үчүгэй олоҕу олорон кэллэхпит.
Николай Филиппович Азаров олоҕун устатын тухары баянын ыһыктыбакка дьоҥҥо –сэргэҕэ үтүө санааны , үөрүүнү эрэ аҕалар сүдү киһи буолар.Кини музыканы эрэ буолбакка спорт өттүгэр эмиэ элбэх ыччаты ииппит- үөрэппит киһи. Билигин даҕаны саастаах спорду таптааччылар кинини өйдүүр, саныыр буолуохтаахтар.
Түмүкпэр этиэм этэ , аныгы ыччакка туһаайан , ол ааспыт сыллар ыччаттарын ааттарыттан:
“Бу сайдыылаах олоххо , төрөөбүт –үөскээбит нэһилиэкпит , түөлбэбит культурнай олоҕо сайдарыгар , өссө күүскэ үлэлээҥ , ыытыллар тэрээһиннэргэ ахтыыбынайдык кыттыҥ. Дьоҥҥо –сэргэҕэ үтүө санааны иҥэриҥ , Чөл олоҕу тутуһуҥ!”
Үлэ бэтэрээнэ,сыана бэтэрээнэ Светлана Георгиевна Константинова
Комментариев нет:
Отправить комментарий