Тыа сирин кулууба үлэтин саҕалаабыта 70 сылынан

 " Киһи эрэ ыллыах баян тыаһа дьиэрэйэрэ..." 

Культура киинигэр 1960-1961 сылларга сэбиэдиссэйинэн үлэлээбит,  сцена ветерана, үлэ ветерана, нэһилиэк Ытык Киһитэ  Анна Федотовна Харитонова ахтыытын сэргии ааҕыҥ.

Сэбиэдиссэйинэн ананан үлэлии киирэрбэр оччолорго кулууп (билиҥҥитэ Оҕо искуст.оскуолата)  көҥдөйө бүтэн баран сиппэккэ турбута. Онтон тутуу биригээдэтэ  ылсан ситэрбитэ. Буор кутуутугар комсомол ыччаттар субуотунньуктаан, сууйан- сотон, кырааскалаан, саҥа дьылы көрсөргө бэлэмнэнэн барбыппыт. Саҥа кулууп киириитэ буолан бары даҕаны санаабыт өрө көтөҕүллэн түүннэри - күнүстэри үлэ үөһүгэр түспүппүт.  Куораттан киирэн ёлка оонньуурдарын атыылаһан  таһаарбыппыт, уолаттар харыйа быһан киллэрэн, түүннэри харыйабытын симээн , 31 чыыһыланы киэргэнэн көрсүбүппүт. Кулууп аһыллыытын көрө киэһээ киһи толору мустубута. Үөдэйтэн, Партизантан маскарадтаах ыччаттар тоҕо анньан кэлбиттэрэ. Нэһилиэкпитигэр аан бастаан саҥа кулууп аһыллан аан бастакы Саҥа дьылы көрсүү киэһэтэ ыытыллыбытын итинник өйдүүбүн. Кэлин мин кэннибиттэн Матрена Кузьминична, Евдокия Николаевна үлэлээбиттэрэ.  Олус талааннаах дьону кытта алтыһан ааспытым, кэнсиэртэргэ куруук кыттыыны ыларбыт.  Аркадий Иванович Васильев чэпчэкитик үктэнэн үҥкүүлээн тэйдэҕинэ саала иһэ хаһыынан  туолара, көрөөччү кутун тутара. Онтон Николай Филиппович Азаров күлэн мүчүк гына - гына имигэс тарбахтарынан баяныгар оонньотоҕуна киһи эрэ ыллыах курдук баян тыаһа дьиэрэйэрэ.  Николай Филипповиһы солбуйар баянист Хомустаахха суох, баар да буолара биллибэт. Кини курдук барытын бары тэрийэр дьоҕурдаах киһи ахсааннаах дии саныыбын.  Оччотооҕу актыбыыстар Колесов И.А., Баишев С.М., Константиновп М.Н., Лаврентьев И.И.,  Лаврентьева Т.Ф., Азарова А.А., Муксунова А.Е. уо.д.а .