Олунньу 28 күнэ - Нэһилиэк күнэ

 2006 сылтан Александр Атласов көҕүлээһининэн олунньу ый 28 күнүгэр Нэһилиэк күнэ ыытыллар. Бу үтүө үгэскэ кубулуйбут тэрээһиҥҥэ сыл түмүгүнэн үлэҕэ, үөрэххэ ситиһиилэммит, общественнай үлэҕэ бастыҥтан бастыҥ дьоммутун бэлиэтиибит. Бу курдук  күн бэҕэһээ нэһилиэкпит үүнэрин-сайдарын туһугар түбүктээх үлэлэрин,  улуус, республика сайдыытыгар ураты кылааттарын киллэрбит үтүө - мааны дьоннорбутун бэлиэтиир тоҕоостоох кэммитин А.Окоемов аатынан " Мичээр" ҮНА " Эҕэрдэ үҥкүүнэн аста. Баһылык В.Г.Жирков, нэһилиэк депутаттарын сэбиэтин председателя Ю.А. Николаев, улуус баһылыгын тыа хаһаайыстыбатын салаатыгар солбуйааччы Ф.В.Николаев эҕэрдэ тыллары анаан,  наҕараадалары туттардылар. Нэһилиэк күнүгэр саамай долгутулаах түгэнинэн    сыл түмүгүнэн анал ааттарыы туттарыы, дьиэ кэргэттэр ааттарыттан стипендиялар олохтоноллоро үтүө холобур буолар. Нэһилиэкпитигэр   бу күн өссө биир бэлиэ тэрээһин - " Эйгэ" аныгы үйэ библиотеката үөрүүлээх аһыллыыта буолла. Саҥа кэм ирдэбилинэн оҥоһуллубут библиотека ыччат бары өттүнэн сайдарыгар төһүү күүс буолара саарбаҕа суох. Үөрүүлээх тэрээһиҥҥэ кэлбит делегация культура тэрилтэлэригэр-  Оҕо искусствотын оскуолатыгар, " Алгыс" НАК сылдьан үлэни, былааны кытта билистилэр. Бу курдук нэһилиэккэ үлэ хаамыыта  күннэтэ өрө тахсыылаахтык ыытылла турар.