МБУ ЦНТ "Алгыс" с. Кысыл- Сыр, Намского улуса

 

Бүгүн  ыам ыйын 23 күнүгэр  -  үгүс көлүөнэ ыччаты үҥкүү кэрэ эйгэтигэр уһуйбут,  “Мичээр”  үҥкүү народнай ансаамбылы төрүттээбит, СР культуратын үтүөлээх үлэһитэ, Нам улууһун Ытык киһитэ Александр Николаевич Окоемов төрөөбүтэ 65 сылынан   сырдык аатын үйэтитэр ,  бэриниилээхтик, таһаарыылаахтык үлэлээбит сиригэр, “Алгыс” Норуот Айымньытын Киинин аартыгар  өйдөбүнньүк стела аһыллар бэлиэ түгэнэ ыытылынна. Биһиги нэһилиэкпитигэр  Александр Николаевич  курдук  айылҕаттан айдарыылаах, сүдү талааннаах киһи кэлэн нэһилиэк култуурата сайдыытыгар сүҥкэн кылааты киллэрэн,  күн бүгүн  нэһилиэкпит   ”Үҥкүүһүт нэһилиэгинэн ” сураҕырар. Кини  дьаныардаах  үлэтин  түмүгүн ,  нэһилиэкпитигэр икки улахан ааттаах- суоллаах  үҥкүү коллективтара   үлэлии тураллара туоһу буолар.

Бэлиэ тэрээһини кини айан хаалларбыт “Намым сирэ”  ырыатынан арыйда   үөлээннээҕэ, доҕоро, СР культуратын туйгуна, Партизан нэһилиэгин ” Хомус”  фольклор дьиэтин директора СЕМЕН ГЕРМАНОВИЧ АЛЕКСЕЕВ.  Өйдөбүнньүк стеланы  арыйар тэрээһиҥҥэ кыттыыны ыллылар-  “Хомустаах 1–кы нэһилиэгэ”  тыа сирин түөлбэтин  баһылыга ВАСИЛИЙ ГАВРИЛЬЕВИЧ ЖИРКОВ,  СР Ил Түмэнин тыа сиригэр уонна аграрнай политикаҕа сис комитетын председателэ АЛЕКСАНДР ПАВЛОВИЧ АТЛАСОВ,  «Нам улууһа» муниципальнай тэриллии  баһылыгын солбуйааччы ЕГОР АНДРЕЕВИЧ ПРОТОПОПОВ,  РСФСР норуотун үөрэҕириитин туйгуна, Нам улууһун Ытык киһитэ, “Мичээр” ансамбль төрүттэниитигэр  олук уурбут  ГАЛИНА ГЕОРГИЕВНА АЛЕКСЕЕВА, бииргэ үөрэммит доҕоро,   улуус баһылыгынан  2003-2008 сылларга үлэлээбит ДМИТРИЙ ПАНКРАТЬЕВИЧ КОРЯКИН,   «Нам улууһа” муниципальнай тэриллии Культураҕа уонна духуобунай сайдыыга Управлениетын начальнигын солбуйааччыАЛЕКСАНДРА НИКОЛАЕВНА НОВГОРОДОВА,   “Алгыс” Норуот Айымьнытын Киинин директора АННА ГРИГОРЬЕВНА МЫЛАХАНОВА,  өр сылларга "Мичээр" ансаамбылы салайбыт ТАТЬЯНА ФИЛИППОВНА ФИЛИППОВА, Аан дойду норуоттарын хомуһун киинин уонна түмэлин үлэһитэ НИКОЛВЙ ЕВСЕЕВИЧ ЖИРКОВ,  култуура эйгэтигэр   бииргэ үлэлэспит, алтыспыт  үөлээннэхтэрэ,  ансаамбыл бастакы выпускниктара, төрөппүттэр, оскуола кэмнэригэр бииргэ үөрэммит доҕотторо ( 1977 выпуск).  Тэрээһиҥҥэ “Мичээри” Мичээр дэппит, киэҥ сураҕырдыбыт, ансаамбыл тумус туттар «Уһун суһуох» үҥкүүтүн  араас сыллардааҕы   ансаамбыл выпускниктара уонна быйыл выпустанар оҕолор толордулар. Бэлиэ тэрээһин кыттыылаахтара  Александр Николаевиһы ахтан- санаан аастылар, үйэтитиигэ үлэлэспит дьоҥҥо махтал тылларын анаатылар.